२९ जेठ २०८३, शुक्रबार
नेपाली राष्ट्रिय पुरुष फूटबल टोली बन्द प्रशिक्षणका लागि पोखरा आएको छ ।
राष्ट्रिय टोलीका खेलाडी तथा अफिसियलसहितको टोली मंगलवार साँझ हवाईमार्गबाट पोखरा आएको हो ।
बुधवारदेखि २ हप्ता पोखराको अन्तर्राष्ट्रिय फूटबल रंगशालामा बन्द प्रशिक्षण सञ्चालन हुनेछ ।
नेपाली टोली दक्षिण एसियाली फूटबलको सर्वोच्च प्रतियोगिता साफ च्याम्पियनसीपको तयारीमा छ । आगामी अक्टोबर १ देखि १३ तारिखसम्म माल्दिभ्समा सो प्रतियोगिता हुने तय भएको छ ।
टोलीलाई पोखरा विमानस्थलमा जिल्ला खेलकुद विकास समितिका अध्यक्ष तोरणबहादुर बानियाँ, जिल्ला फूटबल संघका अध्यक्ष मिलन गुरुङ लगायतले स्वागत गरेका थिए ।
राष्ट्रिय टोलीको बन्द प्रशिक्षणमा ३७ खेलाडीको सहभागिता रहने छन् ।
टोलीको प्रशिक्षणलाई लक्ष्य गरी कास्की जिल्ला फूटबल संघले रंगशालामा आवश्यक सबै तयारी पूरा गरिएको छ । फूटबल रंगशालामा दुवो कटान, मैदान मार्किङ लगायतका काम सम्पन्न गरिएको जिल्ला फूटबल संघका अध्यक्ष गुरुङले जानकारी दिए ।
टोलीका प्रमुख प्रशिक्षक अब्दुल्लाह अलमुताइरी लगायतका अन्य प्रशिक्षकले प्रशिक्षण गराउने छन् ।
