१५ असार २०८३, सोमबार
लियोनल मेसीले पेरिस सेन्ट–जर्मेन क्लबबाट च्याम्यिन्स लीग जित्ने सपना देखेको बताएका छन् ।
बार्सिलोनामा रहँदा उनले चारपटक च्याम्पियन्स लीग जितेका थिए ।
पीएसजी चाहिँ च्याम्पियन्स लीगको फाइनलमा सन् २०२० मा पुगेको भए पनि बायर्न म्युनिखसँग हार्न पुगेको थियो ।
‘पुनः एकपटक च्याम्पियन्स लीग जित्नु मेरो लक्ष्य र सपना हो,’ मेसीले पीएसजीको खेलाडीका रूपमा सार्वजनिक हुने क्रममा बताए ।
१३ वर्षको उमेरमा बार्सिलोना क्लबमा आएका मेसीले उक्त क्लबका लागि ७७८ खेलमा कीर्तिमान ६७२ गोल गरेका छन् ।
‘यति लामो समय एउटै क्लबमा बसेको मेरा लागि यो कठिन परिवर्त हो,’ उनले पार्क देस प्रिन्सेसमा पत्रकारहरूलाई बताए ।
‘तर यहाँ आएको क्षणदेखि म खुशी अनुभव गरिरहेको छु र ट्रेनिङ सेसनमा सहभागी हुन चाहन्छु । मसँग खेलको भोक छ । म अधैर्य छु । म अझै पनि जित्न चाहन्छु ।’
‘यो क्लब सबै ट्रफीहरू जित्नका लागि प्रतिस्पर्धा गर्न तयार छ । मेरो लक्ष्य पनि खेलाडीका रूपमा विकसित भइरहने अनि उपाधिहरू जितिरहने हो । त्यसैले म यो क्लबमा आएको हुँ ।’
