नेपाली कांग्रेसको केन्द्रीय समितिको बैठक ढिलो गरी पार्टी सभापति तथा प्रधानमन्त्री शेरबहादुर देउवाको निवास बुढानीलकण्ठमा शुरू भएको छ ।

नेपाली कांग्रेस सत्तामा सहभागी भएपछिको यो पहिलो केन्द्रीय समितिको बैठक हो ।

ललितपुरको सानेपास्थित पार्टी केन्द्रीय कार्यालय वीपी स्मृति भवनमा क्रियाशिल सदस्यताको विषयलाई लिएर कार्यकर्ताहरु धर्ना र अनसनमा बसेको हुनाले सभापतिले आफ्नै निवासमा बैठक बोलाएका हुन् ।

आज दिउँसो दुई बजेको लागि बोलाइएको बैठक भर्खरै शुरू भएको हो । 

बैठकमा कांग्रेसको १४ औं महाधिवेशनको कार्यतालिकाको विषयमा छलफल हुने प्रवक्ता विश्वप्रकाश शर्माले जानकारी दिए ।

कांग्रेसले सत्ता सम्हाले पछिको पहिलो बैठक भएकाले समसामयिक राजनीतिक विषयमा पनि छलफल गरी निष्कर्षमा निकालिने उनले बताए । 

‘केन्द्रीय समिति बैठकमा पार्टीको आन्तरिक जीवन र समसामयिक विषयमा घनिभूत छलफल गरेर निष्कर्षमा पुग्छौं’, प्रवक्ता शर्माले भने । 

त्यसबाहेक, क्रियाशिल सदस्यता छानविन समितिले पार्टी सभापति देउवालाई बुझाएको प्रतिवेदनको बारेमा पनि बैठकमा छलफल हुने उनले बताए । 

त्यसैगरी, विमलेन्द्र निधि संयोजक रहेको समायोजन समितिको प्रतिवेदन बारेमा पनि बैठकमा छलफल हुने एजेण्डा तय भएको छ । 

बैठकमा सबैजसो केन्द्रीय सदस्यहरूले धारणा राख्ने भएकाले बैठक भोलीसम्म जारी रहने शर्माले जानकारी दिए ।