०८ असार २०८३, सोमबार
चालू आर्थिक वर्षको पहिलो महिनामा साढे एक अर्बभन्दा बढीको वस्तु आयात भएको छ ।
भन्सार विभागले आज सार्वजनिक गरेको चालू आर्थिक वर्ष (२०७८/७९) को पहिलो महिनाको तथ्यांकअनुसार एक खर्ब ५० अर्ब ७३ करोड १७ लाख १९ हजार रूपैयाँ बराबरको विदेशी वस्तुको आयात भएको हो ।
गत आर्थिक वर्ष २०७७/०७८ को पहिलो एक महिना ८५ अर्ब ८० करोड ७९ लाख रूपैयाँ बराबरको आयात गरिएको थियो । सो अवधिका तुलनामा चालू आवमा ७५.६६ प्रतिशतले आयातमा वृद्धि भएको हो ।
यस्तै चालू आर्थिक वर्षको पहिलो एक महिनामा २० अर्ब ७६ करोड ५१ लाख रूपैयाँ बराबरको स्वदेशी वस्तुको निर्यात भएको छ । अन्य आर्थिक वर्षका तुलनामा चालू आर्थिक वर्षको एक महिनामा निर्यातमा उच्चरुपमा वृद्धि भएको हो ।
गत आर्थिक वर्षको सोही अवधिमा ९ अर्ब ६२ करोड रूपैयाँ बराबरका स्वदेशी सामग्री निर्यात गरिएको थियो । तथ्यांकअनुसार गत वर्षको तुलनामा निर्यात ११५.८५ प्रतिशतले बढेको हो ।
गत आर्थिक वर्ष २०७७/०७८ को पहिलो एक महिनाको तुलनामा चालू आर्थिक वर्षको पहिलो एक महिनामा निर्यातसँगै आयातमासमेत वृद्धि भएको छ । त्यस्तैगरी नेपालले साउनमा मात्रै एक खर्ब २९ अर्ब ९६ करोड ६६ लाख रूपैयाँ बराबरको व्यापार घाटा व्यहोरेको छ ।
गत वर्षको सोही अवधिमा ७६ अर्ब १८ करोड ७९ लाख बराबरको व्यापार घाटा व्यहोरेको थियो । गत वर्षको तुलनामा चालू आर्थिक वर्षमा ७०.५९ प्रतिशतले व्यापार घाटा बढेको हो ।
सबभन्दा बढी पेट्रोलियम पदार्थको आयात
विभागले सार्वजनिक गरेको एक महिनाको तथ्याङ्कअनुसार सबैभन्दा धेरै आयात हुने सामग्रीको उच्च स्थानमा पेट्रोलियम पदार्थ छ । एक महिनामा १८ अर्ब १३ करोड बढीको पेट्रोलियम पदार्थको आयात तथ्याङ्कमा उल्लेख छ ।
नेपालमा तेस्रो देशबाट तेलका लागि आवश्यक कच्चा पदार्थ आयात गरी नेपालमा प्रशोधन गरी पुनःतेस्रो मुलुक पठाइने गरिएको छ । एक महिनामा नेपालबाट ११ अर्ब ९३ करोड बढीको तेलजन्य वस्तुको निर्यात गरिएको छ ।
१०२ देशबाट आयात
एक महिनाका अवधिमा १०२ देशबाट एक खर्ब ५० अर्ब ७३ करोड १७ लाख १९ हजार बराबरको विदेशी वस्तुको आयात भएको छ । तथ्याङ्कअनुसार एक महिनाको अवधिमा सबैभन्दा धेरै आयात भारतबाट भएको छ ।
भारतबाट ८९ अर्ब ४८ करोड ६३ हजार बराबरको आयात भएको छ । भारतपछि ठूलोमात्रामा आयात चीनबाट भएको छ ।
चीनबाट एक महिनामा २० अर्ब ९७ करोड ६६ लाख बराबरको आयात भएको छ । एक महिनाको अवधिमा भारतमा १६ अर्ब ८३ करोड ६९ लाख र चीनमा आठ करोड रूपैयाँ बराबरको निर्यात भएको छ ।
