अमेरिकी सेना अफगानिस्तानबाट हटिसकेको भए पनि नेटोका सैनिकहरू त्यहाँ गोप्य मिसनमा खटिएका छन् । 

अफगान कमान्डो र अन्यलाई बचाउनका लागि नेटोका रिटायर्ड र एक्टिभ दुवैथरी सैनिकहरूको एक गठबन्धन गोप्य रूपमा भूमिगत रेलमार्गमा काम गरिरहेको छ । 

सेवानिवृत्त लेफ्टिनेन्ट कर्नेल स्कट मानले डेलीमेललाई बताए, ‘हामी अफगानिस्तनामा फसेका मानिसहरूलाई हवाई क्षेत्रबाहेक अन्तबाट कसरी सुरक्षित बाहिर लग्न सक्छौं ? यो अलिक कठिन छ तर हामी यसलाई फत्ते गरिछाड्नेछौं ।’

अफगानिस्तानबाट अमेरिकी सेना हटेको विषयमा उनीसँग प्रश्न सोध्दा उनले भने, ‘नयाँ सरकारले जिम्मेवारी नलिउन्जेल हामी यतै बस्छौं । उनीहरूले आफ्नो जिम्मेवारी राम्रोसँग निर्वाह गरेको विश्वास भएपछि बल्ल हामी जान्छौं ।’

अफगानिस्तानबाहिर रहेका पूर्व सैनिक र स्वयंसेवकको एक नेटवर्क सुरक्षा तथा मानवीय सहायताका लागि एनक्रिप्टेड च्याटको उपयोग गर्छ । 

स्कट मान र उनका दुई साथी ग्रीन बेरेट्स टास्क फोर्स पाइनएप्पलको नेतृत्व गरिरहेका छन् । उनले भने, ‘हालैका दिनमा ७०० देखि ७५० मानिसलाई बचाइएको छ । तीमध्ये कैयौं अफगान कमान्डो थिए । तिनको परिवार, महिला र बच्चा पनि थिए । कतिपय महिला गर्भवती थिए । हामीले उनीहरूलाई फोहर बग्ने नालीबाट समेत बाहिर निस्कन मद्दत गरेका छौं ।’

गैरसन्य हजारौं विदेशी तथा अफगान नागरिकलाई यस्तै किसिमका गोप्य मिसनमार्फत बचाएको पनि उनले बताए । तालिबान काबुलमा आइपुग्नु अघिदेखि नै यस्तो काम थालेको उनको भनाइ छ ।