शुक्लाफाँटा नगरपालिका–१२ कालागौँडीस्थित रामप्रसाद रानाका घरमा गएराति आगलागी हुँदा लाखौँ मूल्य बराबरका धनमाल जलेर नष्ट भएका छन् । 

टुकीबाट आगलागी सल्किँदा झण्डै आठ लाख रूपैयाँ बढीको क्षति भएको जनाइएको छ । 

अन्नपात, फर्निचर, ओढ्नेओछ्याउने कपडा, महत्त्वपूर्ण कागजपत्र, र गहना सबै जलेर नष्ट भएको वडाध्यक्ष बाले रानाले जानकारी दिए । 

‘टुकी बालेर घरपरिवारका सदस्य अन्यत्र गएका बेला टुकी पल्टिँदा आगलागी भएको जानकारी पाएका छौँ,’ उनले भने, ‘घर पूरै जलेर क्षति भएको छ ।’

नगरपालिकाको दमकल आगो निभेपछि मात्रै आइपुगेको स्थानीयवासीले गुनासो गरे । घर पूरै जलेपछि पीडित परिवारसँग शरीरमा लगाएको एकसरो लुगा मात्रै बचेको छ भने उनीहरू अहिले आफन्तको शरणमा बसेका छन् ।