गण्डकी बोर्डिङ स्कुल पोखराको कक्षा ४ को प्रवेश परीक्षामा अनियमितताको उजुरीपछि अख्तियार दुरूपयोग अनुसन्धान  आयोगले छानबिन थालेको छ । 

अख्तियारको क्षेत्रीय कार्यालय पोखराको टोलीले स्कुलबाट केही दिनअघि परीक्षासम्बन्धी कागजात नियन्त्रणमा लिएर छानबिन गरिरहेको स्रोतले जनाएको छ । अख्तियारले स्कुल विनियमावलीसमेत झिकाएर प्रवेश परीक्षा भए/नभएकोबारे छानबिन भइरहेको जनाएको छ । 

गण्डकी बोर्डिङ देशकै चर्चित स्कुलमध्ये एक हो । यहाँ भर्नाका लागि कक्षा ४ मा बर्सेनि प्रवेश परीक्षा खुल्छ ।

विद्यालयका प्राचार्य यज्ञ शर्माले अख्तियारले कक्षा ४ को परीक्षासम्बन्धी कागजपत्रसहित विनियमावली लगेको स्वीकारे पनि के कति कारणले लगेको आफू अनभिज्ञ रहेको बताए । 

उनले केही साताअघि भएको परीक्षा निष्पक्ष र नियमानुसार भएको दाबी गरे । 

गण्डकी बोर्डिङ पोखरा महानगरपालिका-१६, लामाचौरमा अवस्थित छ ।