२७ जेठ २०८३, बुधबार
एमालेले कारवाही गरेको भनेको १४ जना सांसदलाई बैठकमा सहभागी हुन दिए संसद् बैठक नै चल्न नदिने तयारी एमालेले गरेको छ ।
आज संसद् भवन नयाँ बानेश्वरमा बसेको एमाले संसदीय दलको बैठकमा एमाले अध्यक्ष एवं संसदीय दलका नेता केपी ओलीले गैरसांसदलाई बैठकमा सहभागी हुन दिए बैठक चल्न नदिने बताएका छन् ।
आज दिउँसो ४ बजे संसद्को अधिवेशन बोलाइएको छ । एमालेले साउन २५ गतेको केन्द्रीय कमिटी बैठकले १४ जना सांसदलाई कारवाही गरेको पत्र भदौ १ गते संसद् सचिवालयमा दर्ता गरेको थियो ।
त्यसबेला संसद् चालु नरहेको हुँदा सभामुख अग्नि सापकोटाले सांसदको पद रिक्त भएको सूचना टाँस गर्नुपर्नेमा त्यसो नगरी एमाले विभाजनमा सहयोग गरेको आरोप एमालेले लगाउँदै आएको छ ।
कारवाही गरेको भनिएका माधव नेपालसहितका १४ सांसदहरू नेकपा एकीकृत समाजवादी दलमा आवद्ध छन् । एमालेबाट छुट्टिएर उनीहरू निर्वाचन आयोगमा नयाँ दल दर्ता गरेका हुन् ।
‘गैर सांसदलाई बैठकमा सहभागी हुन दिए त्यसको प्रतिवाद गर्छौं । संसद् बैठक चल्न दिदैनौँ,’ एमाले केन्द्रीय सदस्य तथा सांसद शेरबहादुर तामाङले बताए ।
कारवाही गरिसकेको सांसदलाई बैठकमा सहभागी हुन दिए सभामुखको गैरकानूनी काम हुने तामाङको तर्क छ ।
१४ जना सांसदको पद रिक्त भएको सूचना नटाँसेको भन्दै एमाले सभामुख अग्नि सापकोटाप्रति आक्रोशित छ ।
