बेलायतकी टेनिस खेलाडी राडुकानुले रचिन् इतिहास

बेलायतकी किशोरी टेनिस खेलाडी एम्मा राडुकानुले यूएस ओपनको सेमीफाइनलमा मारिया साक्कारीलाई हराएर इतिहास रचेकी छन् । 

कुनै पनि ग्रान्ड स्ल्यामको फाइनलमा पुग्ने उनी पहिलो क्वालिफायर हुन् । 

उनले साक्कारीलाई ६-१ ६-४ को सोझो सेटमा पराजित गरेकी हुन् । 

एक महिनाअघि मात्र उनले ओर्पिङटनको ग्रामर स्कूलबाट ए लेभल सकेकी हुन् । उनको भिडन्त क्यानडाकी १९ वर्षीया खेलाडी लैला फर्नान्डेजविरुद्ध शनिवार हुनेछ ।

यूएस ओपनमा एउटा पनि सेट नगुमाइकन उनी फाइनलमा पुगेकी हुन् ।

यूएस ओपनको फाइनलमा सन् १९६८ मा भर्जिनिया वेड पुगेकी थिइन् । त्यसपछि फाइनलमा पुग्ने बेलायती महिला राडुकानु नै हुन् ।

दुई महिनाअघि विम्बल्डनमा प्रतिस्पर्धा गर्दा उनी विश्वमा ३६१औं स्थानमा थिइन् । अहिले न्युयोर्कमा यूएस ओपनको १३ दिनमै उनले इतिहास बनाउँदै फाइनलमा प्रवेश गरेकी हुन् । फाइनल पनि जितेमा उनको उपलब्धि ऐतिहासिक हुनेछ ।