दक्षिण अमेरिकाका वैज्ञानिकहरूले उत्खनन गर्दा उड्ने ड्य्रागनको जीवाश्म पत्ता लगाएका छन् । 

दक्षिणी गोलार्धमा पाइएको यो पहिलो जीवाश्म हो । चिलीको अटाकामा रहेको मरुभूमिमा पखेटा भएको यो जीवको अवशेष फेला परेको हो । 

१६ करोड वर्षअघिको यो जीवको लामो र चुच्चो पुच्छर, पखेटा र तीखो दाँत हुन्थ्यो । 

गोन्डवाना नामक अतिविशाल महादेशमा यस प्रजातिका जीवको अस्तित्व थियो । 

अनुसन्धानको नेतृत्व गर्ने चिली विश्वविद्यालयका वैज्ञानिक झोनटन अलारकोनले रोयटर्स समाचार संस्थालाई बताएअनुसार, यस प्रजातिका जनावर निकै धेरै थिए । यिनीहरू उत्तर र दक्षिण अमेरिकामा फैलिएका थिए । 

न्यु साइन्टिस्टमा छापिएको खबरअनुसार, सबभन्दा साना प्रजातिको पखेटा जम्मा २५ सेन्टीमिटर लामो थियो भने सबभन्दा ठूलो पखेटा १० मिटरसम्म लामो हुन्थ्यो । 

यस जीवका विषयमा गरिएको खोजको निष्कर्ष एक्टा पेलीओन्टोलोजिका पोलोनिका नामक पत्रिकामा छापिएको छ ।