प्रमुख प्रतिपक्षी दल नेकपा एमालेले अवरोध कायम राखेपछि प्रतिनिधि सभाको बैठक एक साताको लागि स्थगित भएको छ । 

मंगलवार बजेट प्रतिस्थापनको लागि ल्याइएको विनियोजन विधेयक २०७८ स्वीकृत भएसँगै सभामुख अग्नि सापकोटाले असोज ४ गतेसम्मको लागि बैठक स्थगित गरेका हुन् । 

मंगलवार बसेको बैठकमा पनि विगतमा जस्तै एमाले सांसदहरूले नाराबाजी गरेका थिए । एमालेको नाराबाजीका बाबजुद सभामुख सापकोटाले अर्थमन्त्रीलाई विनियोजन विधेयकमाथि विचार गरियोस् भन्ने प्रस्ताव पेश गर्न समय दिए । 

हो–हल्लाकै बीच सभामुखले प्रस्तावमाथि छलफल चलाए । छलफलमा नेमकिपाका सांसद प्रेम सुवाल सहभागी भए । उनले एमसीसीको विरोध गरे । 

त्यसपछि राष्ट्रिय सभाका पूर्व सदस्य रुक्मशमशेर राणा र संविधानसभाका सभाका पूर्व सदस्य मानबहादुर महतोको निधनमा शोक प्रस्ताव पारित भयो । शोक प्रस्तावको क्रममा नाराबाजी रोकेका एमाले सांसदले फेरि नाराबाजी लगाए । 

त्यसपछि सभामुख सापकोटाले प्रतिनिधि सभाको बैठक असोज ४ गतेसम्म स्थगित गरेका छन् । बीचमा शनिवार र संविधान दिवस परेकोले असोज ४ गतेसम्म बैठक स्थगित गरिएको संसद सचिवालय स्रोतले बतायो । 

‘यसबीचमा प्रमुख प्रतिपक्षी दलसँग संसद खुलाउने विषयमा सार्थक वार्ताका लागि बैठक लामो समयको लागि स्थगित गरिएको हो,’ सचिवालय स्रोतले भन्यो ।

माधव नेपाल लगायत १४ सांसदलाई पदमुक्त गर्ने एमालेको निर्णय कार्यान्वयन नगरेर पार्टी विभाजनमा सभामुखले भूमिका खेलेको आरोप लगाउँदै एमालेले संसद अवरोध गरिरहेको छ ।