अमेरिकाका राष्ट्रपति जो बाइडनले क्यालिफोर्नियाका गभर्नर ग्याभिन न्युसमका लागि भोट माग्ने क्रममा सम्बोधन गर्दा घरिघरि खोकेका छन् ।

७८ वर्ष पुगिसकेका बाइडनले भाषणका क्रममा बारम्बार खोकेपछि पानी पिउनुपरेको थियो । उनले सहभागीसँग माफी पनि मागेका थिए । 

सम्बोधनका क्रममा उनले रिपब्लिकन उम्मेदवार ल्यारी एल्डरको चर्को आलोचना गरे । 

सोमवार राति लंग बीच सिटी कलेजमा आयोजित समारोहमा बाइडनले भने, ‘तपाईंहरूले ग्याभिन न्युसमलाई फेरि जिताउनुस् नत्र डोनल्ड ट्रम्प पाउनुहुनेछ ।’

मंगलवार गभर्नरको निर्वाचन हुन लागेको छ । त्यसमा न्युसम र एल्डर भिडिरहेका छन् । 

न्युसमसँग मिलेर साक्रामेन्टो क्षेत्रमा आगलागीले गरेको क्षतिको अवलोकन गरेका बाइडन पछि लंग बीच आइपुगेका थिए । उनले पोहोर साल डोनल्ड ट्रम्पविरुद्ध लडेको स्मरण गरे । 

‘यो वर्ष रिपब्लिकन पार्टीका उम्मेदवार ट्रम्पका फोटोकपी छन् । उनी यस राज्यका गभर्नर भए भने के होला, अनुमान गर्न सक्नुहुन्छ ? तपाईंहरूले त्यसो हुन दिनुहुन्न । धेरै कुरा धरापमा पर्छ ।’