जब १६ वर्षीया किशोरी एक दिनका लागि गाउँपालिका अध्यक्ष बनिन् ...

उत्तम पोखरेल
उत्तम पोखरेल

पोखरेल लोकान्तर डट्कमका प्रदेश १ प्रतिनिधि हुन् ।

बूढीगंगा गाउँपालिकाकी १६ वर्षीया सुस्मिता ऋषिदेवले एक दिनका लागि गाउँपालिका अध्यक्ष बनेर काम गरिन् । बाल दिवसको अवसरमा गाउँपालिकाका अध्यक्ष बालचन्द्र माझीले आर्थिक र प्रशासनिक बाहेकको अधिकार उनलाई हस्तान्तरण गरे ।


Advertisement

उनले आफूले पाएको अधिकारको भरपुर प्रयोग गरिन् । एक दिनका लागि अध्यक्ष बनेकी सुस्मिताले कर्मचारीलाई निर्देशन दिनेदेखि कार्यपालिकाको बैठक समेत राखिन् ।


Advertisement

अध्यक्षको अधिकार के हो भनी प्रमुख प्रशासकीय अधिकृत डम्बर वल्लभ बरालसँग सोधेर उनले कार्यभार सम्हालेकी थिइन् । निर्वाचित जनप्रतिनिधिसहित बैठकमा बसेकी उनले गाउँपालिकाका कामलाई छिटोछरितो र सहजरूपमा सञ्चालन गर्न निर्देशन दिइन् ।

बैठक सञ्चालनमा प्रमुख प्रशासकीय अधिकृत डम्बरबल्लभ बरालले सहयोग गरेका थिए ।  बैठकमा बालबालिकासम्बन्धी कार्यक्रम सञ्चालनका लागि बाल क्लबले पेस गरेको प्रस्ताव उपर छलफल गरी ५० हजार बजेट निकासा दिने निर्णय समेत भयो ।


Advertisement

उनको अध्यक्षतामा बसेको बैठकले गाउँपालिकामा निर्माण हुने भौतिक संरचना बालमैत्री बनाउने, सन् २०२५ भित्र गाउँपालिकालाई बालविवाह मुक्त घोषणाका लागि (आजै) सोही दिनबाट काम सञ्चालन गर्ने र लामो समयदेखि बन्द रहेको विद्यालय सञ्चालन गर्नका लागि गाउँपालिकाभरिका सबै विद्यालयमा सरसफाइ अभियान सञ्चालन गर्ने निर्णय गर्‍यो ।

बैठकपछि सुस्मिताले स्वास्थ्य चौकी बुढीगंगा र कर्मवीर माध्यमिक विद्यालयको अनुगमन गरेकी थिइन् । स्वास्थ्य चौकी अनुगमन गर्दै उनले त्यहाँ आउने सेवाग्राहीलाई स्वास्थ्यचौकीले दिएको सेवा सुविधाको विषयमा जानकारी लिइन् ।

उनले स्वास्थ्यकर्मीहरूलाई सेवाग्राहीलाई भरपर्दाे र सहज सेवा प्रदान गर्न निर्देशन दिइन् । त्यसपछि उनले अध्यक्षको जिम्मेवारी गाउँपालिका अध्यक्ष माझीलाई हस्तान्तरण गरिन् ।

एक दिनका लागि भए पनि गाँउपालिकामा आउन पाउँदा खुसी लागेको उनले बताइन् ।  गरीबीको रेखामुनि रहेका बालबालिकालाई यसरी नै अगाडि बढाउन खोज्ने हो भने महिला पनि नेतृत्वमा आउन सक्ने उनको भनाइ छ ।

अवसर पाए नेतृत्व गर्न सक्छु भन्ने उनलाई लागेको छ ।

‘अहिले पनि हाम्रो समाजमा बालविवाह बढ्दो अवस्थामा छ । त्यसलाई रोक्नु चुनौतीपूर्ण रहेको छ । आफूले कुनै जिम्मेवारी पाए नेतृत्व गर्न सक्छु भन्ने लागेको छ,’ सुस्मिताले भनिन् ।

बालबालिकाहरूलाई नेतृत्वमा ल्याउने उद्देश्यले एक दिनका लागि गाउँपालिका अध्यक्ष बनाउने कार्यक्रम सञ्चालन गरिएको राष्ट्रिय बाल अधिकार परिषद् प्रदेश १ का समन्वय अधिकृत सुमन अधिकारीले बताए ।

उनले बालबालिकामा नेतृत्व विकासको अभ्यास गराउनुका साथै राष्ट्रिय बाल दिवसलाई नेपालमा नै फरक र नवीन रूपमा मनाउने योजना अनुसार कार्यक्रम गरिएको बताए । 

गाउँपालिका अध्यक्ष माझीले बालिका सुस्मिताले गरेको तीन बुँदे निर्णय कार्यतालिकाको शुक्रवार बस्ने बैठकले अनुमोदन गरी कार्यान्वयन गर्ने बताए ।

बालिकासँग काम गर्न पाउँदा केही कुरा सिक्ने अवसर मिलेको प्रमुख प्रशासकीय अधिकृत  बरालले बताए । 

विपन्न, दलित, सुकुम्बासीको बारेमा केही नयाँ कुराहरू जानकारी भएको उनको भनाइ छ । 

बालबालिका, किशोरी, महिला, विपन्न, दलित, सुकुम्वासीको गाउँपालिकाप्रतिको बुझाइ र अपेक्षाका बारे जान्ने अवसर प्राप्त भएको समेत गाउँपालिका अध्यक्ष माझीले बताए ।

उत्तम पोखरेल
उत्तम पोखरेल

लेखकबाट थप...

कमेन्ट गर्नुहोस्