२२ जेठ २०८३, शुक्रबार
प्रयागराजमा रहेको बाघम्बरी गद्दी मठका महन्त नरेन्द्र गिरीको शंकास्पद अवस्थामा भएको मृत्युलाई प्रहरीले तत्कालका लागि आत्महत्या मानेर अनुसन्धान गरिरहेको छ ।
गिरीको शव फाँसीमा झुण्डिएको अवस्थामा फेला परेको थियो र सात पृष्ठ लामो सुसाइड नोट पनि त्यतै थियो ।
घटनास्थलमा उपलब्ध सुसाइड नोटमा उल्लेख भएअनुसार तीनवटा कुरामा विवाद देखिन्छ : बाघम्बरी गद्दीको उत्तराधिकार, मठको सम्पत्ति र शिष्यसम्बन्धी विवाद ।
यी तीन विषयमा नरेन्द्र गिरी र शिष्य आनन्द गिरीबीच विवाद थियो । यसअघि पनि सम्पत्तिको विषयमा नरेन्द्र गिरीका शिष्य आशिष गिरीले आरोप लगाएर पछि आत्महत्या गरेका थिए ।
प्रयागराजमा बस्ने नरेन्द्र गिरी पहिलोपटक सन् २०१५ मा विवादमा आएका थिए । त्यतिखेर उनले सचिन दत्ता नामक घरजग्गा व्यवसायीलाई महामण्डलेश्वरको उपाधि दिएका थिए ।
पछि त्यसमा विवाद उठ्यो र महामण्डलेश्वर उपाधि फिर्ता लिइयो । उनलाई निरंजनी अखाडाको सदस्यताबाट पनि बर्खास्त गरियो ।
बाघम्बरी मठको जग्गा प्रयागराजमा मात्र नभई नोयडामा पनि छ । त्यसको मूल्य अर्बौं रुपैयाँ रहेको बताइन्छ । त्यसबाहेक मठ र संगममा रहेको हनुमान मन्दिरबाट पनि करोडौं रुपैयाँको आम्दानी हुने गरेको छ । नरेन्द्र गिरीले कैयौं बिघा जमीन बेचेको र आएको पैसा आफ्ना नातेदारलाई दिएको आरोप आनन्द गिरीले लगाएका थिए ।
नरेन्द्र गिरीका निकट शिष्य र निरञ्जनी अखाडाका सचिव आशिष गिरीले सन् २०१९ को नोभेम्बर १७ मा गोली हानेर आत्महत्या गरेका थिए । आशिषले जमीन बेच्ने कुराको विरोध गरिरहेका थिए । तर प्रहरीले अनुसन्धानपछि गम्भीर रोग लागेका कारण आशिषले आत्महत्या गरेको बताएको थियो ।
आनन्द गिरीलाई कुनै समयमा महन्त नरेन्द्र गिरीको उत्तराधिकारी मानिन्थ्यो । सन् २००५ मा आफूलाई उत्तराधिकारी बनाइएको र सन् २०१२ मा वसियत समेत दिइएको आनन्दको दाबी छ ।
वसियत भए नभएको पुष्टि हुन सकेको छैन । तर त्यही वसियत तथा उत्तराधिकारका कारण नरेन्द्र र आनन्दबीच विवाद शुरू भएको बताइन्छ । सम्पत्तिका विषयमा विवाद पनि यसैसँग जोडिएको थियो ।
