३१ जेठ २०८३, आइतबार
दक्षिण एसियाली क्षेत्रीय सहयोग संगठन सार्क मुलुकहरूको बैठक यही शनिवार बस्नुपर्नेमा तालिबानलाई सहभागी गराउने विषयमा विवाद भएपछि रद्द गरिएको छ ।
भारतीय समाचार संस्था एएनआईका सूत्रहरूका अनुसार, पाकिस्तानले न्युयोर्कमा हुने यस बैठकमा अफगानिस्तानका प्रतिनिधिका रूपमा तालिबान नेतालाई समावेश गराउनुपर्ने माग राख्दा अन्य सदस्यले आपत्ति जनाए । आम सहमति नबनेपछि बैठक रद्द गरिएको छ ।
सार्कका अन्य सदस्य बैठकमा अफगानिस्तानको प्रतिनिधिको कुर्सी खाली राख्न चाहन्थे । तर तालिबान प्रतिनिधिलाई पनि समावेश गर्नुपर्ने भनी पाकिस्तानले अड्डी कसेको थियो ।
संसारका प्रमुख देशले तालिबानलाई मान्यता नदिइसकेकाले औपचारिक बैठकमा तालिबान प्रतिनिधिलाई सहभागी गराउन अन्य मुलुकहरू हच्किएका हुन् ।
तालिबान सरकारका धेरै मन्त्रीहरूलाई संयुक्त राष्ट्रसंघले कालो सूचीमा राखेको छ । परराष्ट्रमन्त्री आमिर खान मुतक्की राष्ट्रसंघको कार्यक्रममा भाग लिन पाउँदैनन् ।
तालिबानसँग पाकिस्तानको पुरानो सम्बन्ध छ र उसले तालिबानलाई सहायता गर्दै आइरहेको छ । अफगानिस्तानमा तालिबानको सरकार पुनः बन्नमा पाकिस्तानको सहयोग रहेको बताइन्छ ।
