नेकपा माओवादी केन्द्रका अध्यक्ष पुष्पकमल दाहाल प्रचण्डले आफू बिग्रेकोले देशको राजनीति बिग्रेको र अब सुध्रिने अभिव्यक्ति दिएका छन् । 

काभ्रेको पाँचखालमा योङ कम्युनिष्ट लिग (वाइसीएल)को नगर सभालाई सम्बोधन गर्दै प्रचण्डले अरू मात्रै बिग्रेको तर आफू सही रहेको भन्ने प्रवृत्तिको कारण नै पार्टी र राजनीति बिग्रिएको बताएका हुन् ।

प्रचण्डले भने, ‘राजनीतिमा जो जति माथि आएको छ त्यो बिग्रेको छ । त्यसैले अहिले धेरै भन्दिन बिग्रेको मै हो भनेको छु । अब म चाहिँ सच्चिन्छु, को–को सच्चिने नसच्चिने तपाईहरू सोच्नुस् भनेको छु ।’
सबैले अरूलाई दोष दिएर सबै अरूले नै बिगारे भन्नुभन्दा मैले के बिगारे भनेर सोच्न थालियो भने त्यहीँबाट रूपान्तरण सुरू हुने प्रचण्डले बताए । 

उनले भने, ‘म त फेरि एक पटक हाम फाल्छु । हिजो जनयुद्धमा हाम फाले, शान्ति प्रक्रियामा हाम फाले, त्यसपछि संविधान बनाउनेमा हाम फालियो, पार्टी एकतामा हाम फालियो र अब समाजवादी क्रान्तिको लागि म चाहिँ हाम फाले । म अरुलाई भन्दा पहिला आफैलाई करेक्सन गर्नेतर्फ छु । कति वर्ष बाँचिन्छ त्यो सबै समय युवाहरुको नेतृत्व गरेर समाजवादी क्रान्तिमा लाग्छु ।’

चुनाव जितेका टाठा बाठा धेरै बिग्रिएको भन्दै प्रचण्डले भने, ‘मैले जसलाई धेरै पटक मन्त्री बनाए त्यही सबैभन्दा ठूलो भगौडा । त्यही धोकेबाज भयो । मन्त्री बनाएपछि ठिक हुन्छ भन्ने ठानेको त के हुन्थ्यो । टोपबहादुर भन्नेलाई कति पटक मन्त्री बनाए । बादल हिजोको मेरो साथी बढी त भन्दिन । अहिले सम्झिँदा पनि एलर्जी हुन्छ ।’

वाइसीएललाई उत्तेजित बनाउने प्रयास

पाँचखाल पुगेर प्रचण्डले वाइसीएललाई उत्तेजित बनाउने उद्देश्यले भाषण गरेका छन् ।

इँटको जवाफ पत्थरले दिने गरी तयार हुन प्रचण्डले वाइसीएललाई निर्देशन दिएका छन् ।

 ‘अबको चुनावमा माओवादी पहिलो पार्टी हुँदैछ । पहिलो पार्टी हुनु पनि पर्छ’, उनले भने, ‘२०६४ मा पहिलो पार्टी भएको वाइसीएलकै कारण हो । वाइसीएल २०६४ मा फर्कनुपर्‍यो । अबको चुनाव ०६४ को जस्तो बनाउनै पर्छ । आइलागे भने इटाको जवाफ पत्थरले दिनुहोला । संरक्षण गर्ने जिम्मा हाम्रो भयो ।’

गाउँ गाउँमा वाइसीएलको प्रभाव हुनुपर्ने र जाली फटाहलाई ठाउँको ठाउँ ठीक पार्न सक्नुपर्ने उनले बताए । 

‘०६४ को चुनावमा गर्नु पनि गरियो र नगर्नु पनि गरियो त्यसैले ०६४ को चुनाव जितेका हौ । अब पनि चुनावमा जालझेल गर्नेहरुलाई भ्याकुर लखेटेझै लखेट्ने हो । तपाईंहरु तयार हुनुहोला’, प्रचण्डले भने, ‘हामी पनि शान्तिपूर्ण भन्ने र गुण्डा तथा भ्रष्टहरूलाई ठोक्ने नै हो । फटाहा आए भने गोद्ने भन्ने निर्णय गर्नुहोला त्यति भए ०६४ को भन्दा बढी हुन्छ ।’ 

प्रचण्डले अहिले माओवादी आन्दोलनको विरासत एक्लै बोकिरहेको दावी गरेका छन् ।  

‘मेरो टाउका हजारौ सहिदको भारी छ । अन्तिम साससम्म पनि विरासतको लागि लड्नुको विकल्प मलाई छैन । माओवादी आन्दोलनको विरासत एक्लै बोकिरहेको छु’, उनले भने । 

विभाजित भएका माओवादीहरूलाई एक ठाउँमा ल्याउने प्रयास भइरहेको पनि उनले बताए । 

‘माधव नेपाल, झलनाथको पार्टी बनाउनेमा हाम्रो पनि कम मेहनत छैन । मोहन, किरण विप्लव, माधव नेपाल सबैको पार्टीसँग स्थानीय तहमा हार्दिक बढाउनु होला । केन्द्रमा पनि हार्दिक बढाएका छौं’, प्रचण्डले भने ।