प्रधानमन्त्री शेरबहादुर देउवाले शपथ लिएको ८५ दिनपछि सत्तारुढ गठबन्धनबीच मन्त्रालयमा भागबण्डा मिलेको छ । 

नेपाली कांग्रेसले ७ तथा गठबन्धनका अन्य दलले ५/५ मन्त्रालय लिने गरी सहमति भएको बालुवाटार स्रोतले बतायो । 

प्रधानमन्त्री निवास बालुवाटारमा मंगलवार बसेको सत्तारुढ गठबन्धनको बैठकले मन्त्रालय भागबण्डामा सहमति जुटाएको हो । सहमतिसँगै आजभोलिमै मन्त्रिपरिषद्लाई पूर्णता दिने सहमति भएको छ । 

‘अब कुनै बहानाबाजीले मन्त्रिपरिषद् विस्तार रोकिँदैन,’ मन्त्रालय भागबण्डा मिलाउन गठित कार्यदलका एक सदस्यले भने । यसअघि नेकपा एकीकृत समाजवादी र जनता समाजवादी पार्टी (जसपा)ले एउटै मन्त्रालयमा दाबी गरेपछि भागबण्डामा कुरा मिलेको थिएन । 

स्रोतका अनुसार भौतिक पूर्वाधार मन्त्रालय जसपाले पाउने भएको छ । शिक्षा तथा विज्ञान प्रविधि र वन मन्त्रालय पनि जसपाले पाउने सहमति भएको जसपा स्रोतले बतायो । 

नेकपा (एस)ले भने शहरी विकास, उद्योग वाणिज्य तथा आपूर्ति र संस्कृति पर्यटन तथा नागरिक उड्डयन मन्त्रालय पाउने तय भएको छ । माओवादी केन्द्रले कृषि तथा पशुपन्छी विकास मन्त्रालय र खानेपानी मन्त्रालय पाउने भएको छ । 

माओवादीले अर्थ र ऊर्जा मन्त्रालय यसअघि नै पाइसकेको छ । गृह, परराष्ट्र र कानून मन्त्रालय पाएको कांग्रेसले सञ्चार तथा सूचना प्रविधि मन्त्रालय, स्वास्थ्य मन्त्रालय र महिला बालबालिका तथा ज्येष्ठ नागरिक मन्त्रालय पाउने मोटामोटी सहमति भएको छ । 

दलहरूले मन्त्रीको नाम दिएलगत्तै प्रधानमन्त्री देउवाले राष्ट्रपतिलाई मन्त्रिपरिषद् विस्तारका लागि सिफारिश गर्ने बालुवाटार स्रोतले बतायो । सकेसम्म बुधवार र ढिलोमा शुक्रवारसम्म मन्त्रीहरूलाई शपथ गराएर सरकारलाई पूर्णता दिने तयारी भएको नेताहरूले बताएका छन् । 

सरकारका प्रवक्तासमेत रहेका कानूनमन्त्री ज्ञानेन्द्रबहादुर कार्कीले भरे भोलिमै मन्त्रिपरिषद् विस्तार हुने जानकारी दिए । मन्त्रिपरिषद्मा प्रधानन्यायाधीशले भागबण्डा खोजेको कुरा गलत भएको बताएका छन् । 

नेकपा माओवादी केन्द्र अध्यक्ष पुष्पकमल दाहाल प्रचण्डले सोमवार नै मन्त्रिपरिषद् विस्तारको तयारी भएको बताएका थिए । प्रधानमन्त्री देउवाले असार ३१ गते शपथ गरेर सानो आकारको मन्त्रिमण्डल बनाएका थिए ।