भारतका वायुसेना प्रमुख मार्शल वीआर चौधरीले पूर्वी लद्दाख नजिक तीनवटा एयरबेसमा चिनियाँ वायुसेना तैनाथ रहेको बताएका छन् । 

तिब्बत स्वायत्त क्षेत्रमा चिनियाँ जनमुक्ति सेनाको वायुसेनाले एयरफील्ड बनाइरहेको विषयमा चौधरीलाई प्रश्न गर्दा चीनले एयरक्राफ्ट शेल्टरहरू बनाइरहेको तर अग्ला एयरफील्डबाट नियमित रूपमा मिसन लोन्च गर्ने चिनियाँहरूको क्षमता कमजोर रहेको बताए । 

एस–४०० एयर डिफेन्स मिसाइल सिस्टम यही वर्ष वायुसेनामा संलग्न गरिने जानकारी पनि चौधरीले दिए । उनले एयरफोर्समा अहिले लगभग ३० स्क्वाड्रन छन् र चीन पाकिस्तानसँगको टु फ्रन्ट वारका लागि ४२ स्क्वाड्रन आवश्यक भएको बताए । तर यत्तिका स्क्वाड्रन कहिलेसम्म बन्छ भनी उनले खुलाएनन् ।