२८ जेठ २०८३, बिहीबार
बागमती प्रदेश सरकारले असोज २४ गते विश्वासको मत लिने भएको छ ।
प्रदेश सरकारले असोज २४ गते संसदको नियमित अधिवेशन बोलाउने निर्णय गरेको आर्थिक मामला तथा योजना मन्त्री रचना खड्काले बताइन् ।
‘असोज २४ गते संसदको नियमित अधिवेशन बोलाउने निर्णय भएको छ । त्यही दिन सरकारले विश्वासको मत लिने तयारी पनि छ,’ उनले भनिन् ।
यसअघिका मुख्यमन्त्री डोरमणि पौडेललाई राजीनामा गर्न लगाएर बागमती प्रदेशको मुख्यमन्त्रीमा अष्टलक्ष्मी शाक्यलाई नियुक्त गरिएको थियो ।
गत भदौ २ गते शाक्यले मुख्यमन्त्री पदको शपथ लिएर सोही दिन पदभार ग्रहण गरेकी थिइन् । नेकपा एमालेको आन्तरिक विवाद उत्कर्षमा पुगेर विभाजनको संघारमा पुगेको बेला शाक्य मुख्यमन्त्री बनेकी थिइन् ।
मुख्यमन्त्री बनेकै दिनबाट अल्पमतमा परेकी शाक्यले बल्ल विश्वासको मत लिन लागेकी छन् ।
बागमती प्रदेशमा एमालेको एकल बहुमत थियो तर एमालेबाट माधवकुमार नेपाल समूह छुट्टिएर नयाँ पार्टी बनेपछि शाक्यको सरकार अल्पमतमा परेको थियो ।
बागमतीमा नेकपा एकीकृत समाजवादी पार्टीका संसदीय दलका नेता राजेन्द्र पाण्डेले मुख्यमन्त्रीको दाबी गरेका छन् ।
