०९ साउन २०८३, शनिबार
गत वर्षको तुलनामा यस वर्ष दशैंमा खसीबोका कम बिक्री भएपछि बाँकी रहेका खसीबोका गाउँ फर्काउन थालिएको छ ।
दशैंमा काठमाडौं उपत्यकाबाट सर्वसाधारणहरू गाउँ फर्किएपछि खसीबोका बजारमा गत वर्षझैँ बिक्री नहुँदा बाँकी रहेका खसीबोकाहरूलाई व्यापारीहरूले गाउँ फर्काउन थालेका हुन् ।
काठमाडौं उपत्यकामा यस वर्ष मागभन्दा धेरै खसीबोका भित्र्याएपछि बिक्री नभएको काठमाडौं चौपाया खरिदबिक्री प्रालिका बजार व्यवस्थापक जीवराज खतिवडाले बताए ।
उनले कोरोना महामारीको जोखिम कायमै भएकोले त्यसको असर पशुचौपाय व्यापारमा पनि परेको उनको भनाइ छ । यस वर्ष काठमाडौं चौपाया खरिदबिक्री प्रालिमा ३५ हजारसम्म खसीबोका ल्याएको र २५ हजारसम्म बिक्री भएको बताए ।
‘कोरोना भाइरसको महामारी आएसँगै हरेक क्षेत्रमा यसको असर गरेको छ, पर्यटन क्षेत्र माथि उठ्न नसक्दा व्यापार भएको छैन,’ उनले भने ।
बजार व्यवस्थापक खतिवडाले नेपाल सरकारले बजारको मागअनुसार काम नगरेको भन्दै सरकार पक्षबाट बजारीकरणको व्यवस्था मिलाइनु पर्ने बताए ।
यस वर्ष काठमाडौं उपत्यकामा व्यापारीहरूले ६५ हजार खसीबोका भित्र्याएको बताइएको छ । बिक्री हुन नसकेका खसीबोका भने धमाधम गाउँ फर्काइएको व्यवसायीहरूले बताएका छन् ।
