अल्पमतमा परेको भनिएको १ नम्बर प्रदेश सरकारले राजनीति नियुक्तिलाई बढावा दिइरहेको छ ।

बिहीवार प्रदेशका १४ जिल्लाका खेलकुद विकास समितिका अध्यक्ष र उपाध्यक्षहरू नियुक्त गरिएका छन् ।

नियुक्त गरिएका अध्यक्ष, उपाध्यक्षलाई बिहीवार नै सामाजिक विकास मन्त्रालयमा कार्यक्रमको आयोजना गरी शपथ ग्रहण गराइएको छ । केही दिनअघि मात्रै मन्त्रिपरिषद्को बैठकले प्रदेश खेलकुद विकास बोर्ड गठन गरेको थियो ।

खेलकुद विकास बोर्डले जिल्लास्तरीय समिति गठन गरेको छ । १ नम्बर प्रदेश सरकारले विश्वासको मत लिने गरी अगाडि बढे पनि राजनीति नियुक्ति रोकेको छैन । विपक्षी गठबन्धनले राजनीतिक नियुक्ति नगर्न चेतावनी दिए पनि मुख्यमन्त्री भीम आचार्य नेतृत्वको सरकारले नियुक्ति रोकेको छैन ।

मुख्यमन्त्री आचार्यले विश्वासको मत लिने समय छलेर विभिन्न अनियमितता गरेको आरोप विपक्षी गठबन्धनका दलले लगाइरहेका छन् । नवनियुक्त अध्यक्ष तथा उपाध्यक्षलाई भोलि शुक्रवारसम्म जिल्ला समितिलाई पूर्णता दिन समेत  निर्देशन दिइएको छ ।

प्रदेश पर्यटन बोर्डका सदस्य सचिव पर्शुराम बस्नेतले भोलि शुक्रवार बिहान १० बजेसम्ममा सबै जिल्लालाई पदाधिकारीसहित सबै सदस्यको नाम पठाउन निर्देशन दिएका छन् । प्रदेश सरकारको काम कार्यकर्तालाई जागिर खुवाउने मात्रै भएको आरोप लागिरहेका बेला बोर्डका अध्यक्ष समेत रहेका सामाजिक विकास मन्त्री बलबहादुर सामसोहाङले प्रदेश खेलकुद ऐनअनुसार काम गरेको बताएका छन् ।

खेलकुद विकास बोर्डले बिहीवार २८ जना एमाले कार्यकर्तालाई नियुक्ति दिएको छ । जसमा ताप्लेजुङमा मणि शकर पोमु अध्यक्ष र पोमा लिम्बु उपाध्यक्ष रहेका छन् । 

अध्यक्ष र उपाध्यक्षमा क्रमशः पाँचथरमा विनोद आङदेम्बे र शान्ति राई, इलाममा उमेश गुरुङ र कुमारी राई, झापामा चन्द्र प्रसाईं र तुला प्रधान उप्रेती, मोरङमा रोहित कोइराला र शितल राय, सुनसरीमा घनश्याम बुढाथोकी र अन्जु पाण्डे नियुक्ति भएका छन् । 

धनकुटामा भोगचन्द्र थापा र चालु शेर्पा, तेह्रथुममा केशव भट्टराई र तारा कार्की गुरुङ, संखुवासभामा ध्रुव खड्का र सुनिता गुरुङ, भोजपुरमा प्रकाश बस्नेत र विनिता राई, खोटाङमा रमेश राई र पवित्रा मकाजु श्रेष्ठ, सोलुखुम्बुमा डिकबहादुर राना पाल र डिक माया सुनुवार, ओखलढुंगामा नारायण काजी राई र मिना केसी, उदयपुरमा सागर नेपाल र मनकुमारी राई क्रमशः अध्यक्ष र उपाध्यक्ष बनेका छन् ।

मोरङका अध्यक्ष रोहित कोइरालाले पदभार ग्रहण गर्दै मोरङको खेलकुद विकास समितिमा राजनीति कार्यकर्तालाई नियुक्त गरेर खेलकुद क्षेत्रलाई अगाडि बढाउने बताए ।