०१ असार २०८३, सोमबार
नेकपा एमालेको स्थायी कमिटी बैठक शुक्रवार दिउँसो २ बजे पुनः बस्ने गरी स्थगित भएको छ ।
बिहीवारको बैठकमा एमालेको दशौं राष्ट्रिय महाधिवेशन स्थल बुटवलबाट चितवनमा सार्ने निर्णय भएको छ ।
दशौं राष्ट्रिय महाधिवशेन आयोजना गर्नका लागि स्थायी कमिटी सदस्य रामबहादुर थापा ‘बादल’को संयोजकत्वमा २१ सदस्यीय मूल व्यवस्थापन समिति गठन गरेको एमालेका प्रवक्ता प्रदीप ज्ञवालीले जानकारी दिए ।
बैठकले विधान महाविधेशनको समीक्षा गरेको र असोजको १५–१७ सम्म गोदावरीमा सम्पन्न विधान महाधिवेशन भव्य र ऐतिहासिक रूपमा सफल भएको निष्कर्ष बैठकले निकालेको ज्ञवालीले बताए ।
महाधिवेशनले पार्टीपंक्तिमा भावनात्मक एकताको सन्देश सम्प्रेषण गरेको निष्कर्ष स्थायी कमिटी बैठकले निकालेको उनले बताए ।
बिहीवारको बैठकमा केही दिनअघिको अविरल वर्षाका कारण भएको जनधनको क्षतिमा एमालेले गहिरो दुःख व्यक्त गरेको, वर्षा र बाढी पहिरोका कारण पीडामा परेकाहरूप्रति सहानुभूति व्यक्त गरेको उनले बताए ।
भित्र्याउन ठिक्क भएको धानबाली नोक्सानी व्यहोरेका किसानलाई तत्काल राहत प्याकेज उपलब्ध गराउन र घरबार गुमाएकाहरूलाई तत्काल पुनःस्थानपना गर्न सरकारसँग माग गरिएको उनले बताए ।
सरकारले रेडक्रस र गैरआवासीय नेपाली संघको क्रियाकलापमा हस्तक्षेप र त्यस्तो नाङ्गो राजनीतिक हस्पक्षेप तत्काल बन्द गर्न बैठकले आह्वान गरेको ज्ञवालीले बताए ।
१० बुँदे सहमति कार्यान्वयन गर्न बनेको कार्यदलको बैठक पनि बिहीवारै बसेको र त्यसको निष्कर्ष भोलि शुक्रवारको स्थायी कमिटी बैठकमा प्रस्तुत गरिने उनले बताए ।
