बलिउडका सुपरस्टार शाहरुख खानका छोरा आर्यन खानलाई नार्कोटिक्स कन्ट्रोल ब्युरो (एनसीबी) ले लागूपदार्थको मुद्दामा पुर्पक्षका लागि कारागारमा राखेपछि बलिउडमा लागूपदार्थ सेवनको समस्याका विषयमा चर्को बहस भइरहेको छ । 

भारतीय सञ्चारमाध्यमहरूले बलिउडमा सक्रिय ड्रग माफियालाई भण्डाफोर गरी कारवाही गर्न सरकारलाई आग्रह गरिरहेका छन् । सामाजिक सञ्जालमा पनि ह्याशट्याग बलिउडड्रगीज, ह्याशट्याग ड्रगीवूड, ह्याशट्याग सुपरकपसमीरवान्खेडे ट्रेन्डिङमा छ । 

त्यसो त विगत एक वर्षदेखि बलिउडमा लागूपदार्थ सेवनको समस्याका विषयमा व्यापक चर्चा हुन थालेको थियो । उदाउँदा कलाकार सुशान्त सिंह राजपूतको असामयिक मृत्युपछि उनी र उनकी प्रेमिका रिया चक्रवर्तीले लागूपदार्थ सेवन गर्ने गरेको सार्वजनिक भएको थियो । 

बलिउडको चकाचौंधमा लुकेका विकृत पक्षहरू थुप्रै छन् र लागूपदार्थ सेवन त्यसको पछिल्लो कडी हो । त्यसो त निकै पहिला पनि सञ्जय दत्तले लागूपदार्थ सेवन गर्ने गरेको र त्यसको नशाबाट मुक्त हुनका लागि पुनःस्थापना केन्द्रमा समय बिताएको विषयले चर्चा कमाएको थियो । उनको जीवनीमा बनेको फिल्म ‘संजू’मा त्यसलाई दर्शाइएको छ । उनीबाहेक यो यो हनी सिंह, फरदीन खान, कपिल शर्मा, प्रतीक बब्बर, (ऋतिक रोशनकी पूर्वपत्नी) सुजैन खान पनि दुर्व्यसनको लत छुटाउन पुनःस्थापना केन्द्रमा बसेका थिए ।

यथार्थवादी फिल्म बनाउने निर्देशक मधुर भण्डारकरले सन् २००८ मा सार्वजनिक गरेको चलचित्र फेशनले मोडलिङको दुनियाँमा लागूपदार्थ सेवनको समस्यालाई उजागर गरेको थियो । त्यसमा लागूपदार्थ सेवनको समस्याका कारण पतन भएकी शोनाली गुजराल नामक मोडलको भूमिका कंगना रनावतले निर्वाह गरेकी थिइन् । 

कंगनाले आफू पनि लागूपदार्थको दुर्व्यसनी बनेको स्वीकार गर्दै आईजीटीभीमा एउटा भिडियो अप्लोड गरेकी थिइन् । तिनै कंगना अहिले बलिउडमा लागूपदार्थको भयावह समस्याका विषयमा बताउँछिन् । 

कंगनाले बलिउडमा लगभग ९० प्रतिशत व्यक्तिले लागूपदार्थ सेवन गर्ने गरेको दाबी पोहोर साल गरेकी थिइन् । उनले प्रहरी र राजनीतिकर्मीहरू पनि बलिउड सेलेब्रिटीसँग लागूपदार्थ सेवनको साझेदार बन्ने गरेको आरोप लगाएकी थिइन् । 

कंगनाको आरोपलाई सही साबित गर्दै एनसीबीले गरेको व्यापक धरपकडले बलिउडमा लागूपदार्थको समस्या विकराल देखाएको छ । विशेषगरी जोनल डाइरेक्टर समीर वानखेडेले मुम्बईमा एनसीबीलाई पहिलेभन्दा बढी सक्रिय बनाएपछि बलिउडमा लागूपदार्थ सेवनको समस्या छताछुल्ल भएको हो । 

द वीक नामक वेबसाइटले उल्लेख गरेअनुसार, वान्खेडेसँग एउटा कोर टीम छ जसले व्यावसायिक तरिकाले छापा मार्ने गरेको छ र सफलता पनि हात पारेको छ । प्रोजेक्ट एपोक्यालिप्सी नामक कारवाहीमा वान्खेडे मातहतका अधिकारीहरूले जंगलका धापमा राति ६ घन्टासम्म लुकेर मुम्बईको आरेमा लागूपदार्थ तस्करी गरिरहेका सशस्त्र नाइजेरियालीहरूलाई पक्राउ गरेका थिए । वान्खेडेको आगमनपछि बलिउडको ड्रग माफियाको बारेमा संसारभरिका मानिसले जानकारी पाएका छन् । 

पोहोर साल अक्षय कुमारले पनि बलिउडमा लागूपदार्थ सेवनको समस्या रहेको बताएका थिए । तर उनले सबैजनालाई एउटै डालोमा राखेर हेर्न नहुने पनि बताएका थिए । 

फिल्म निर्देशक विवेक अग्निहोत्री बलिउडमा विगत एक दशकमा लागूपदार्थ सेवनको समस्या चर्किएको बताउँछन् । फर्स्टपोस्टमा प्रकाशित उनको लेखमा लागूपदार्थलाई फिल्म र संगीत क्षेत्रमा ग्ल्यामराइज तथा रोमान्टिसाइज गरिएकाले समस्या बढेको उल्लेख छ । लागूपदार्थको सेवनलाई फिल्महरूमा हलुका रूपमा लिइँदा त्यसको प्रभाव अन्य व्यक्तिहरूमा मात्र नभई सेलेब्रिटीहरूमै परेको उनी दाबी गर्छन् । 

अहिले सेलेब्रिटीहरूले गर्ने लागूपदार्थ सेवनका विषयमा मिडियाले निकै धेरै प्रचारप्रसार गरिरहेको देख्दा उनीहरू नशामा जतिखेर पनि झुम्मिएर बस्छन् कि जस्तो लाग्छ । तर त्यसो हुन्थ्यो भने उनीहरू जिममा गएर कडा व्यायाम गर्नै सक्दैनथिए होलान् । 

त्यसैले स्वास्थ्यप्रति सचेत रहँदै उनीहरू कहिलेकाहीँ लागूपदार्थ सेवन गर्ने गर्छन् जस्तो देखिन्छ । बलिउडका इतिहासकार इम्तियाज बग्दादी धेरैजसो सेलेब्रिटीहरू दुर्व्यसनी नभई रमाइलोका लागि लागूपदार्थ सेवन गर्ने गरेको बताउँछन् । 

तर बलिउडमा रेभ पार्टी (लागूपदार्थ सेवन गर्ने पार्टी) हरू बाक्लै आयोजना गरिने समाचारहरू आइरहेका छन् । आर्यन खान पनि विलासी क्रुज जहाज कोर्डेलिया एम्परेसमा आयोजित रेभ पार्टीमा सहभागी भएको अवस्थामा पक्राउ परेका हुन् । 

बलिउडका शीर्ष कलाकारहरूसँग नजिकिनका लागि सानातिना कलाकार पनि रेभ पार्टीहरूमा सहभागी हुने गरेको बताइन्छ । त्यस्तै लामो संघर्षपछि बलिउडमा नाम र दाम कमाएका कलाकारहरू पैसाको व्यवस्थापन गर्न नजान्दा पनि लागूपदार्थ सेवनको चक्करमा पर्ने गरेको भारतीय सञ्चारमाध्यमहरूले लेखेका छन् । 

पैसा, प्रसिद्धि र प्रशंसा बलिउडले उपलब्ध गराउँछ । अनि भावुक भारतीयहरू बलिउडका कलाकारलाई देउतालाई झैं पुज्छन् । त्यसले पनि सेलेब्रिटीहरूलाई जे गरे पनि हुन्छ भन्ने मैमत्तपनाका लागि प्रेरित गर्ने गरेको छ । उनीहरू अरूलाई लागूपदार्थ सेवन नगर्न सल्लाह दिन्छन् तर आफैं यो घिनलाग्दो र स्वास्थ्यलाई हानि गर्ने कुराको सेवन गरिरहेका हुन्छन् ।

केही वर्षअघि लागूपदार्थ आपूर्ति गराउने बकुल चन्दरिया नामक व्यक्तिलाई लाखौं रूपैयाँ पर्ने लागूपदार्थका साथ पक्राउ गरिएको थियो । चन्दरियाले बलिउडका शीर्ष कलाकारहरू आफ्नो ग्राहक भएको स्वीकार गरेका थिए । उनले सलमान खान तथा रणवीर कपूरसँग खिचाएको तस्वीर सार्वजनिक भएको थियो ।

त्यसो त लागूपदार्थ सेवन बलिउडको मात्र नभई भारतभरिकै समस्या हो । लागूपदार्थ तथा अपराधसम्बन्धी संयुक्त राष्ट्रसंघको कार्यालय (यूएन ओडीसी) र भारतको सामाजिक न्याय मन्त्रालयले प्रकाशन गरेको प्रतिवेदनमा करोडौं भारतीयहरू रक्सी, गाँजा तथा लागूपदार्थको नशामा फसेका छन् । उक्त प्रतिवेदनले उल्लेख गरेअनुसार, भारतमा गाँजासँगै हेरोइन र मेथयाम्पहेटामाइन जस्ता कडा लागूपदार्थको पनि व्यापक सेवन हुने गरेको छ । 

यस्तो भयावह समस्यालाई निराकरण गर्ने दायित्व बलिउडले पनि वहन गर्नुपर्ने हुन्छ । दम मारो दम, जानबाज, चरस, देव डी जस्ता फिल्ममार्फत बलिउडले भारतमा लागूपदार्थ सेवनको समस्याको चित्र प्रस्तुत गरेको छ । 

तर सेलेब्रिटीहरूमा नै यो समस्या देखिँदा चाहिँ उनीहरू मौन छन् । अझ आर्यन खानलाई प्रतिरक्षा गर्नका लागि उनीहरूले विभिन्न बहाना बनाइरहेका छन् । 

बलिउडमा शुद्धीकरण अभियान शुरू गर्नुपर्ने आवश्यकता विगत एक वर्षदेखिको खुलासाहरूले बोध गराएका छन् । यसलाई गम्भीरतापूर्वक समाधान गरिन्छ कि मीटू आन्दोलन दबाएझैं दबाइन्छ भविष्यले बताउनेछ ।