रूपन्देहीको बुटवल उपमहानगरपालिका–१२, ढवाहकी अनिता रेग्मी रहस्यमय मृत्यु भएको छ । 

ढवाहँकै सुमन खनालसँग २०७५ सालमा वैवाहिक जीवनमा बाँधिएकी २७ वर्षीय रेग्मी असोज अन्तिम साता घरमै झुन्डिएको अवस्थामा फेला परेकी थिइन् । उनी अमेरिका जाने तयारीमा थिइन् । सुमनले अमेरिकाबाट नेपाल छुट्टीमा आएको बेला अनितासँग २०७५ साल माघ ४ गते विवाह गरेका थिए । 

अनिताको आत्महत्या नभई हत्या भएको भन्दै प्रदर्शन गरेका छन् । ‘न्याय दे, महिला हिंसा अन्त्य गर, बुहारी मार्न पाइँदैन, दाइजो लिनु अपराध हो’ लगायतका प्ले कार्डसहित राजमार्गमा प्रदर्शन गरिएको छ । 

मृतकका बाबु रामचन्द्र रेग्मीले घटना लगत्तै पीडकलाई नियन्त्रणमा नलिनु र अनुसन्धानका क्रममा असम्बन्धित व्यक्ति प्रवेश गर्नुले प्रहरीको भूमिकामाथि शंका गर्नुपर्ने अवस्था आएको बताए ।

सुमनले विवाह गर्दा कुनै पनि दाइजो नचाहिने बताए पनि विवाहपछि भने बारम्बार दाइजोको विषयलाई लिएर मानसिक तनाव दिँदै आएको माइती पक्षको आरोप छ । माइती पक्षले छोरीले आत्महत्या गरेको नभई हत्या गरिएको बताउँदै आएको छ । 

प्रहरीले आत्महत्या दुरुत्साहन मुद्दामा सासू र कान्छा देवरलाई पक्राउ गरी अनुसन्धान गरिरहेको छ । 

रुपन्देहीको तिलोत्तमाकी सीता भण्डारी पौडेलको पनि रहस्यम मृत्युपछि ४६ दिनको दिन गएको हप्ता दाहसंस्कार गरिएको थियो । 

सीताको न्यायको लागि भन्दै आन्दोलित माइती पक्षले अन्तिममा ११ लाख रूपैयाँ लिएपछि दाहसंस्कार गरेका थिए ।