आगामी मंसिर ११–२२ गतेसम्म दोस्रो ऋषिङ अध्यक्ष भलिबल कप २०७८ प्रतियोगिता हुने भएको छ ।

गाउँपालिका कार्यालयले मंगलवार दमौलीमा पत्रकार सम्मेलन गरी प्रतियोगिताबारे जानकारी दिएको छ ।

ऋषिङ समृद्धिको आधार, कृषि संस्कृति पर्यटन र पूर्वाधार भन्ने मूलनाराका साथ गत वर्षदेखि शुरूआत भएको भलिबल प्रतियोगितालाई यस वर्ष पनि निरन्तरता दिन लागेको गाउँपालिका कार्यालयले जनाएको छ ।  

जिल्लाको दक्षिण भेगमा पर्ने ऐतिहासिक एवं पुरातात्विक दृष्टिले महत्त्वपूर्ण पालिकाको रूपमा परिचित ऋषिङ गाउँपालिकालाई विकास निर्माणको साथै खेलकूद क्षेत्रको केन्द्रका रुपमा विकास गर्न लागिएको गाउँपालिकाका अध्यक्ष राजेन्द्रकृष्ण श्रेष्ठले जानकारी दिए । जनप्रतिनिधि निर्वाचित भएर आएको दोस्रो वर्षदेखि नै राष्ट्रपति रनिङ सिल्ड प्रतियोगिताबाट शुरू गरिएको उनले बताए ।

तेस्रो वर्षदेखि विकास निर्माणका कार्यलाई तीव्रता दिँदै खेल जगतलाई पनि सँगसँगै लैजानुपर्छ भन्ने उद्देश्यले खेलकूदलाई प्राथमिकतामा राखिएको हो । अध्यक्ष श्रेष्ठले भने, ‘गाउँपालिकाको साथसाथै मुलुकभरका खेलाडीको प्रतिभालाई ऊजागर गर्न यो प्रतियोगिता  प्रभावकारी बन्दै गएको छ ।’

प्रतियोगितामा प्रथम हुनेले १ लाख ४० हजार, दोस्रोले १ लाख, तेस्रोले ६० हजार र सान्त्वना हुनेले ३० हजार रुपैयाँ नगद तथा प्रमाणपत्र पाउनेछन् ।