३० जेठ २०८३, शनिबार
प्रमुख प्रतिपक्षी दल नेकपा एमालेका प्रचार विभाग प्रमुख योगेश भट्टराईले नेकपा (एकीकृत समाजवादी)लाई अवैध सम्बन्धबाट जन्मिएको पार्टीको संज्ञा दिएका छन् ।
बुधवार काठमाडौंमा आयोजित पत्रकार सम्मेलनमा बोल्दै भट्टराईले एकीकृत समाजवादीलाई अवैध सम्बन्धबाट जन्मिएको पार्टीको संज्ञा दिएका हुन् ।
उनले चितवनमा हुने पार्टीको १० औँ राष्ट्रिय महाधिवेशनमा प्रमुख राजनीतिक दलहरूलाई मात्र बोलाउने बताउँदै अवैध सम्बन्ध र अवैध गर्भधारणबाट जन्मिएको एकीकृत समाजवादीलाई बोलाइरहनु नपर्ने बताए ।
उनले नेकपा (एकीकृत समाजवादी) पार्टीलाई पहिचान र ठेगाना नभएको टिप्पणी गरे ।
प्रचार विभाग प्रमुख भट्टराईले भने, ‘नेकपा एमालेको १० औँ राष्ट्रिय महाधिवेशनमा प्रमुख राजनीतिक दलहरूलाई निमन्त्रण दिने कुरामा एकीकृत समाजवादीको पनि पत्रकार साथीले नाम लिनुभयो । प्रमुख राजनीतिक दलहरूलाई हामीले निमन्त्रणा गर्ने हो, कतिपय राजनीतिक दलको पहिचान र ठेगाना नै स्पष्ट छैन । अवैध सम्बन्ध, अवैध गर्भधारणबाट बनेका पार्टीहरू छन् ।
त्यस्ता पार्टीलाई महाधिवेशनमा बोलाइरहनुपर्छ जस्तो लाग्दैन । पहिचान र ठेगाना स्पष्ट भएका प्रमुख राजनीतिक दलहरूलाई यो महाधिवेशनमा आमन्त्रण गरिनेछ ।’
प्रचार विभाग प्रमुख भट्टराईले गठबन्धन सरकारका कारण मुलुकमा संविधान मिचिएको र संवैधानिक अंगहरूमाथि हस्तक्षेप भएको बताए । उनले गठबन्धन सरकारले संवैधानिक अंगहरूमा स्वेच्छाचारिताको गम्भीर प्रश्न उठेको बताउँदै शक्तिहरूको स्वार्थमा देशमा राजनीतिक अस्थिरता पैदा गरेको आरोप लगाए ।
प्रचार विभाग प्रमुख भट्टराईले भने, ‘आज मुलुकमा राजनीतिक अनिश्चयको स्थिति पैदा भएको छ । संविधान मिचिँदै छ । संवैधानिक अंगहरूमाथि कार्यपालिकाको हस्तक्षेप छ । संवैधानिक अंगहरूमा स्वेच्छाचारी प्रक्रियामार्फत् गम्भीर प्रश्न उठ्न थालेको छ । देशलाई यसरी अन्योल माहोलमा राख्नुहुँदैन । अलोकतान्त्रिक, स्वेच्छाचारी, असंसदीय ढंगबाट राजनीतिक अस्थिरतातिर मुलुकलाई धकेल्ने प्रयत्न भइरहेको छ, शक्तिहरूको स्वार्थमा ।’
प्रचार विभाग प्रमुख भट्टराईले १० औं राष्ट्रिय महाधिवेशन ऐतिहासिक र भव्य हुने बताउँदै उक्त महाधिवेशनमा विधान महाधिवेशन भएको दुई महिनामा भएका ठूला राजनीतिक घटनाहरूको बारेमा पनि पार्टीले स्पष्ट धारणा राख्ने बताए ।
