नेकपा एमालेले दशौं राष्टिय महाधिवेशनको लागि सबै प्रतिनिधि मनोनयन टुंगो लगाएको छ । आज बसेको स्थायी कमिटीको बैठकले कुल प्रतिनिधिको पाँच प्रतिशत मनोनयन गरेर महाधिवेशन प्रतिनिधि टुंगो लगाएको हो ।
ललितपुरको च्यासलस्थित तुलसीलाल स्मृति प्रतिष्ठानमा बसेको स्थायी कमिटी बैठकले १०३ जना प्रतिनिधि मनोनीत गर्ने निर्णय गरेको प्रचार विभाग प्रमुख योगेश भट्टराइले बताए । यससँगै एमाले महाधिवेशन प्रतिनिधिको संख्या २ हजार २९७ पुगेको छ । एमालेको १०औं राष्ट्रिय महाधिवेशन यही मंसिर १० देखि १२ गतेसम्म चितवनमा हुँदैछ ।

दशौं राष्ट्रिय महाधिवेशन अन्तर्गत सवै उम्मेदवारको मनोनयन मंसिर ११ गते र १२ गते बिहान ८ बजेबाट मतदान सुरु हुने भट्टराइले बताए । पार्टी निर्वाचन आयोगको सिफारिसका आधारमा स्थायी कमिटी बैठकले उक्त कार्यतालिका अनुमोदन गरेको उनले जानकारी दिए ।

एमालेको महाधिवेशनमा पदेन प्रतिनिधि २३८, निर्वाचित प्रतिनिधि १८७९ निर्वाचित भैसकेका छन । त्यसैगरी, उत्पीडित दलित तर्फका १९५ र त्यसमा ६२ जना महिला रहेका छन् । अहिलेसम्म कुल महिला प्रतिनिधि ५७६ छन् ।
त्यसबाहेक, महोत्तरी, रौतहट र भुपू सैनिकबाट गरी ६८ जना प्रतिनिधि चयन भएर आउन बाँकी रहेको उनले बताए । मनोनित र चयन हुन बाँकी ६८ जनाबाट पनि दलित र महिला सदस्य थपिने भट्टराइले बताए ।