प्रशान्त महासागरमा रहेको सोलोमन टापुमा प्रधानमन्त्रीको राजीनामा माग्दै भएको प्रदर्शनका क्रममा बुधवार विरोधकर्ताहरूले संसद् भवन र प्रहरी चौकीमा आगजनी गरेका छन् । 

हिंसा चर्किएर लुटपाट हुन थालेपछि प्रहरीले प्रदर्शनकारीमाथि अश्रूग्यास र रबरको गोली प्रहार गरेको थियो । स्थिति नियन्त्रणमा लिनका लागि राजधानी होनिआरामा ३६ घन्टाका लागि लकडाउन लगाइएको छ । 

प्रधानमन्त्री मनास्सेह सोगावरेले बुधवार अबेर राति देशको नाममा सम्बोधन गर्दै राजधानीमा लकडाउन लगाउने घोषणा गरे । 

सोलोमन टापुसमूहको सबभन्दा धेरै जनसंख्या भएको टापु मलैटाबाट मानिसहरू राजधानी पुगेको र उनीहरूले सरकारका कतिपय नीतिमा आक्रोश व्यक्त गरेको बताइएको छ । आधारभूत संरचना सुधार गर्ने वाचा सरकारले पूरा नगरेको उनीहरूको आरोप छ । 

सन् २०१९ मा ताइवानसँग सम्बन्ध तोडेर चीनसँग औपचारिक सम्बन्ध कायम गरेको सोलोमन टापुले खासै फाइदा उठाउन सकेको छैन । 

प्रधानमन्त्री सोगावरेले शुक्रवार साँझ ७ बजेसम्म लकडाउन लगाउने बताए । हिंसामा संलग्न व्यक्तिहरूको खोजी गर्ने र घटना दोहोरिन नदिनका लागि प्रयास गर्ने उनको भनाइ छ ।