गुल्मी कांग्रेस नेतृत्वका लागि दुई जना युवा नेताले उम्मेदवारी घोषणा गरेका छन् ।

गुल्मीको आठौं जिल्ला अधिवेशन शुक्रबार शनिबार हुँदैछ । अहिलेसम्म सभापतिका दुई आकांक्षीले आफ्नो उम्मेदवारीको औपचारिक घोषणा गरेका छन् ।

महाधिवेशन प्रतिनिधिद्वय खिलध्वज पन्थी र बेद बहादुर थापामगरले सभापतिका लागि उम्मेदवारी घोषणा गरेका हुन् ।

पन्थी वरिष्ठ नेता रामचन्द्र पौडेल पक्षका हुन् । पन्थीले पत्रकार सम्मेलन र थापाले सामाजिक संजालमार्फत उम्मेदवारीको घोषणा गरेका हुन् । खिलध्वज पन्थी नेपाली कांग्रेस जिल्ला कार्यसमितिका सचिव हुन् । 

पन्थी भर्खरै सम्पन्न भएको क्षेत्र नं १ को कांग्रेस क्षेत्रीय निर्वाचनमा सबैभन्दा बढी ६२३ मत प्राप्त गरेर महाधिवेशन प्रतिनिधिमा निर्वाचित भएका छन् । बिजय भएर उत्सब मनाएका र पराजित भएर मन दुखाएका सवै साथीहरुलाई एकतावद्ध बनाएर आर्थिक क्रान्ति र वास्तविक समाजवाद निर्माणमा आफुले काम गर्ने पन्थीको भनाइ छ । 

बेद थापामगर पनि कांग्रेस सभापतिका दावेदार हुन् । उनी अहिले कालीगण्डकी गाउँपालिकाका प्रमुख छन । उनी क्षेत्र नं १ को कांग्रेस क्षेत्रीय निर्वाचनमा ५८७ मत प्राप्त गरेर महाधिवेशन प्रतिनिधि भए । थापामगर यस अगाडि जिल्ला अधिवेशनमा सभापतिका उम्मेदवार थिए । उनले पार्टीलाई संस्थागत गर्न, गुटबन्दीको अन्त्य गरेर वडा, पालिका, क्षेत्र तथा महाधिवेशन प्रतिनिधिमा पराजित मित्रहरूलाई सँगै लिएर अगाडि बढ्न सभापतिमा उम्मेदवारीको घोषणा गरेको बताए । 

उनले महाधिवेशनका सवै प्रतिनिधी विवेकशील भएकाले अभिमतको कदर गर्न आफु तयार रहेको बताए । थापामगर देउवा पक्षका उम्मेदवार हुन् । जिल्ला सभापति भुवन प्रसाद श्रेष्ठले सर्वसम्मत नेतृत्व आफुले पाउनुपर्ने तर्क गर्दै आएका छन् । तर, आधिकारिक उम्मेदवारीको घोषणा गरेका छैनन् । सभापतिको दाबेदार महेन्द्र भण्डारी, विष्णु सापकोटा, विष्णु बलाल, श्रीप्रसाद भलामी लगायतका नेताले औपचारिक घोषणा गरेका छैनन् । अहिलेसम्म जिल्लामा देउवा र पौडेल पक्षको चर्चा देखिएको छ । 

प्रतिनिधिको हिसावले पौडेल पक्ष बलियो देखिए पनि सजिलोसँग नेतृत्व पौडेल पक्षलाई नदिने दाउमा देउवा पक्ष छ । क्षेत्र नं २ मा दरिलो देखिएको पौडेल पक्षको आडमा खिलध्वज पन्थीले सभापतिको उम्मेदवारी घोषणा गरेका छन्  भने  क्षेत्र नं १ मा बेद थापा मगरले आफुले प्राप्त गरेको मतसँगै क्षेत्र नं १ र २ मा पौडेल पक्षबाट असन्तुष्ट मतहरु बटुलेर नेतृत्व लिने कसरतमा लागेको कांग्रेसका एक नेताले बताए ।