नेपाली कांग्रेसको आसन्न १४औं महाधिवेशनअन्तर्गत दैलेख जिल्ला कार्यसमितिको सभापति पदमा मणिराम रेग्मी निर्वाचित भएका छन् ।

प्रतिद्वन्द्वी घनश्याम भण्डारीलाई ३७ मत अन्तरले हराउँदै ७९१ मत ल्याएर उनी विजयी भएका हुन् ।

गत शुक्रवारदेखि शुरूआत भएको अधिवेशनमा शनिवार मतदान र आइतवार साँझ मतगणना सम्पन्न भएको थियो ।

जिल्ला नेतृत्व चयनका लागि भएको मतदानमा १ हजार ५५९ मत खसेको थियो । कांग्रेसका जिल्ला निर्वाचन अधिकृत अधिवक्ता विवशकुमार बस्नेतले उपसभापतिमा नवराज शाही, रीताकुमारी शाही, सचिवमा खेमराज वली, नारायणप्रसाद रेग्मी, सहसचिवमा कनकबहादुर सेन र महेन्द्रबहादुर शाही निर्वाचित भएका छन् ।

प्रदेश महाधिवेशन प्रतिनिधिमा विमलविक्रम शाही र केन्द्रीय महाधिवेशन प्रतिनिधिमा नरबहादुर खड्का निर्वाचित भएका छन् ।

कांग्रेसका पुराना नेता नवनिर्वाचित रेग्मी १३ औं महाधिवेशनमा पनि सभापतिको उम्मेदवार भई पराजित भएका थिए । दैलेख क्षेत्र नम्बर २ का पूर्व क्षेत्रीय सभापति भण्डारी हाल दुल्लू नगरपालिकाका प्रमुख हुन् ।