मंसिर १० देखि १४ गतेसम्म चलेको नेकपा एमालेको दशौं महाधिवेशनले १७ बुँदे प्रस्ताव पारित गरेको छ । 

मंगलवार सम्पन्न हुन लागेको महाधिवेशनले १७ बुँदे प्रस्ताव पारित गरेको छ । 

मंगलवार साँझ शुरू घोषणा सभामा उपमहासचिवमा निर्वाचित प्रदीप ज्ञवालीले सुनाएको प्रस्ताव महाधिवेशन हलले सर्वसम्मत रुपमा पारित गरेको हो । 

प्रस्तावमा न्यायालयभित्र भइरहेको अराजकता असार २८ गतेको परमादेशको ‘बाइप्रडक्ट’ भएको उल्लेख छ । 

एमालेले परराष्ट्र नीति सम्बन्धमा सत्तारुढ दलका नेताहरूको परस्पर विरोधी धारणा र सरकारको असंगत व्यवहारको विरोध गरेको छ । एमालेले भागवण्डाका लागि प्रदेशहरूमा मन्त्रालय फुटाउने कामको विरोध गरेको छ । 

प्रस्तावमा आगामी महाधिवेशनबाट एमालेलाई पहिलो पार्टीको रुपमा स्थापित गर्ने अठोट गरिएको छ । एमालेले दक्षिणपन्थी अवसरवादको विरोध गरेको छ । 

वरिष्ठ उपाध्यक्षमा निर्वाचित ईश्वर पोखरेलले अध्यक्ष केपी शर्मालाई बलियो बनाउने महाधिवेशनको अठोट रहेको बताए । औपचारिकता पूरा गर्नको लागि मात्र महाधिवेशन नगरेको उनले दाबी गरे ।

मंगलवार साँझ जारी घोषणा सभामा एमाले अध्यक्षमा निर्वाचित केपी शर्मा ओली र अध्यक्षमा पराजित भीम रावल सहभागी छन् । पार्टीको निर्वाचन आयोगले मतगणनाको नतिजा सुनाएपछि निर्वाचितहरूको शपथ शुरू हुनेछ ।