धितोपत्र बजारमा शेयर कारोबार मापक नेप्से परिसूचक बिहीवार पनि उच्च अंकले घटेको छ ।

नेपाल स्टक एक्सचेञ्जका अनुसार नेप्सेमा बिहीवार ४९.०४ अंकले गिरावट आई २ हजार ५८४.६१ मा ओर्लेको छ ।

ठूला कम्पनीको शेयर कारोबार मापन गर्ने सेन्सेटिभ परिसूचक ९.४६ अंकले ओरालो लागेर ४८७.२७ मा ओर्लेको छ ।

नेप्सेमा उच्च अंकको गिरावट देखिँदा त्यसको प्रभाव कारोबार रकममा समेत परेको छ । कूल २३१ कम्पनीको ९ लाख ३२ हजार ७३१ कित्ता शेयर ३ अर्ब ४१ करोड ३५ लाख ८९ हजार १२६ रुपैयाँ मूल्यमा खरिद बिक्री भए ।

शेयर कारोबार हुने हप्ताको अन्तिम दिनको कारोबारपछि बजार पूँजीकरण ३६ खर्ब ३५ अर्ब ७६ करोड ४३ लाख ४० हजार रुपैयाँ बराबर पुगेको छ ।

नेप्सेका अनुसार कारोबार भएका १३ वटै उपसमूहको शेयर ओरालो लागेको छ । त्यसमा बैंकिङ १७.८८, व्यापार ३६.०५, होटल तथा पर्यटन ६२.३७, विकास बैंक १८९.०१, जलविद्युत् ६६.६५, वित्त ९३.३७, निर्जीवन बिमा २४५.८५, उत्पादन १५३.६७, अन्य ७५.६९, लघुवित्त ८४.४, जीवन बिमा २३०.८३, सामूहिक लगानी कोष ०.२ र लगानी १.४१ अंकले ओरालो लागेको छ ।

नेप्सेका अनुसार कारोबारका आधारमा बिहीवार पनि महालक्ष्मी विकास बैंक शीर्षस्थानमा रहेको छ । सो बैंकको १२ करोड ४३ लाख ३९ हजार ३०६ रुपैयाँ बराबरको कारोबार भयो । हिमालयन डिस्टिलरी ११ करोड ७९ लाख १९ हजार २२, नेसनल हाइड्रोपावर १० करोड ९७ लाख ५० हजार ३४७, नेपाल दूरसञ्चार कम्पनी ९ करोड ८६ लाख ४७ हजार ४४ र नबिल बैंक ९ करोड १५ लाख ८८ हजार १०० रुपैयाँ बराबरको कारोबार भई शीर्ष ५ भित्र पर्न सफल भए ।

नेप्सेका अनुसार सामालिङ पावर ९.९९, न्यादी हाइड्रोपावर ९.९८, महिला लघुवित्त ८.५०, नेपाल एसबिआई बैंक १.६९ र सबैको लघुवित्तका लगानीकर्ताले १.६० प्रतिशतले कमाए । कर्पोरेट डेभलपमेन्ट बैंक ६.८०, मैलुङ खोला जलविद्युत् कम्पनी ६.७५, शिवश्री हाइड्रोपावर ५.५७, युनाइटेड इदी मर्दी हाइड्रोपावर ५.४१ र गुडविल फाइनान्सका लगानीकर्ताले ५.३९ प्रतिशतले गुमाए ।