संघीय संसद्को प्रमुख दल नेकपा एमालेले मुलुकको राजनीतिक निकासको एकमात्र विकल्प प्रतिनिधि सभाको चुनाव भएको बताएको छ । ताजा जनादेशबाट मात्र समस्याको समाधान निस्कने एमालेको निष्कर्ष छ । 

काठमाडौंको थापाथलीस्थित पार्टी केन्द्रीय कार्यालयमा शुक्रवार पदबहाली गर्दै एमाले अध्यक्ष केपी शर्मा ओलीले देशको समय बर्बाद हुन नदिन पनि अब मुलुक ताजा जनादेशमा जानुपर्ने पार्टीको धारणा सुनाएका हुन् । 

चुनावले मात्र निकास दिने भन्दै ओलीले प्रधानमन्त्री रहेको समयमा गत वर्ष पुस ५ गते र यसै वर्षको जेठ ८ मा प्रतिनिधि सभा विघटन गरेका थिए । 

मुलुक यसप्रकारको गतिहीनताबाट लामो समय जान नसक्ने भन्दै छिटोभन्दा छिटो ताजा जनादेशमा जानुपर्ने उनले बताए । 

‘निष्पक्ष ढंगले चल्ने खालको सरकारका निम्ति निर्वाचन जरुरी छ । अब ताजा जनादेशमा जानु पर्छ । ताजा जनादेशबाट समस्याको समाधान निस्किन्छ,’ ओलीले भने, ‘जनताले सबै कुराको मूल्यांकन गरेका छन्, मूल्यांकनका आधारमा उपयुक्त फैसला गर्नेछन् । जनतामा जान डराएर कृत्रिम ढंगले सत्ता चलाउने कुरा हुन सक्दैन ।’

सरकार सञ्चालनमा गठबन्धन असफल भइसकेको ओलीले दाबी गरे ।

‘राष्ट्रिय राजनीति जसरी अन्यौलग्रस्त भएको अवस्था छ, यस स्थितिलाई अन्त्य गरेर देशलाई सही बाटोमा अगाडि बढाउने क्रममा लाग्छौं हामीहरू । देश अहिले वर्तमान गठबन्धनको सरकार छ, यसबाट देश चलिरहेको छैन । सबैले अनुभूत गरेको कुरा हो, भन्ने नभन्ने बेग्लै कुरा हो । सरकार चलिरहेको छैन, यस्तोलाई चलेको भन्ने हो भने नचलेको केलाई भन्ने ?’ ओलीले भने, ‘यसप्रकारको गतिहीनता मुलुकले लामो समय भोग्न सक्दैन । छिटोभन्दा छिटो ताजा जनादेशमा जानुपर्छ । देशको समय बर्बाद गर्नु हुँदैन ।’​

संसद् चल्न नदिने संकेत

सदनमा प्रमुख प्रतिपक्षी दल नेकपा एमालेको संसदीय दलका नेता समेत रहेका ओलीले मंसिर २८ गतेदेखि शुरू हुने संसदको हिउँदे अधिवेशन चल्न नदिने संकेत गरे ।

पार्टीले निस्कासन गरेका सांसद सहभागी गराएर संसद् बैठक चल्न नसक्ने उनले बताए । 

‘संसद् किन बोलाइएको थाहा छैन, तर निष्काशित व्यक्तिलाई संसद्भित्र राखेर संसद् कसरी चल्न सक्छ ? नियमले गैरसांसदलाई बस्न दिँदैन । २८ गतेको संसद् बैठकमा उनीहरू आउँछन् भने बैठक चल्न सक्दैन,’ ओलीले भने । 

माधव नेपाललगायत १४ सांसदलाई निष्काशन गर्ने निर्णय सभामुखले कार्यान्वयन नगरेको भन्दै एमालेले लामो समय संसद् अवरुद्ध गरेको थियो । 

एमालेले भदौ २४ गते शुरू गरेर कात्तिक १२ गते सकिएको संसद्को अधिवेशनभर अवरोध गरेको थियो । 

ओलीले सभामुख अग्नि सापकोटाले एमालेका विरुद्ध सत्ता पक्षसँग लागेर अपवित्र गठबन्धन गरेर एमाले फुटाउन लागेको आरोप लगाए । 

सरकारको सिफारिशमा राष्ट्रपति विद्या भण्डारीले मंसिर २८ गतेको लागि संघीय संसदको दुवै सदनको बैठक आह्वान गरेकी छिन् ।