आफ्नै सौताका १० वर्षीय छोरालाई विष खुवाएर हत्या गरेको आरोपमा एक महिलालाई कैलाली प्रहरीले भारतको हरियाणाबाट पक्राउ गरेको छ ।

बाजुरा जिल्लाको खप्तड छेडेदह गाउँपालिका-२ घर भई हाल कैलाली धनगढी उपमहानगरपालिका-२ मालिका टोलस्थित रोहिणीप्रसाद जोशीको घरमा डेरा गरी बस्ने ३५ वर्षीया मागी रोकायालाई पक्राउ गरेको हो । रोकायाले आफ्नी सौता निर्मला थापामगरका छोरा निशान्त थापामगरलाई विषादी खुवाई हत्या गरेको प्रहरीले जनाएको छ । 

धनगढी उपमहानगरपालिका-२ स्थित हिमालय एकेडमीमा कक्षा ३ मा पढ्ने निशान्तलाई उनले मंसिर २ गते विष खुवाई आफ्ना २ बच्चासहित सम्पर्कविहीन बनेकी थिइन् ।

जिल्ला प्रहरी कार्यालय कैलालीका प्रहरी नायव उपरीक्षक वेदप्रकाश जोशीका अनुसार मागीका श्रीमान बहादुर रोकायाले मंसिर २ गते भारतबाट आफन्तलाई फोन गरी मागी रोकाया सम्पर्कविहीन भएकोले बुझ्नलाई डेरा गरी बस्ने कोठामा पठाएका थिए । 

डेरा कोठा पुग्दा कोठाको अगाडिको मूल ढोका बन्द भई पछाडिपट्टिको ढोका खुल्ला रहेको, कोठाभित्र पंखा चालू अवस्थामा रहेको, कोठाभित्र बालकको खुट्टा मात्र अगाडिको झ्यालबाट देखिएको र अन्य मानिसहरू उक्त डेरा कोठामा कोही नभएको भनी उनीहरूका आफन्तबाट प्रहरी कार्यालयमा जानकारी प्राप्त भएको बताइएको छ । 

प्रहरीले तत्काल घटनास्थलमा सो डेरा कोठाभित्र हेर्दा मागी रोकायासँगै बस्ने गरेका निशान्त मृत अवस्थामा फेला परेको प्रहरी नायव उपरीक्षक जोशीले जनाए । प्रहरीले तत्काल भारतीय प्रहरीको सहयोगमा खोजी कार्य थालेको थियो ।

उनलाई मंसिर १६ गते भारतको हरियाणा रोहतक प्रेम चोकमा फेला पारी नेपाल ल्याइएको प्रहरीले बताएको छ ।

प्रहरीको प्रारम्भिक अनुसन्धानअनुसार मागीका श्रीमान बहादुर रोकाया रोजगारीको सिलसिलामा भारतमा रहेको र करीव ३ वर्ष अघिदेखि निशान्त थापामगरकी आमा निर्मला थापामगरसँग भारत मै विवाह गरी सँगै बस्दै आएका थिए ।

करीब ३ वर्षअघि नै मागी १४ वर्षकी छोरी र ८ वर्षको छोरालाई पढाउन धनगढीमा बस्दै आएकी थिइन् । बहादुर रोकायाले निर्मलालाई विवाह गरिसकेपछि छोरा निशान्तलाई पढाउन धनगढीस्थित हिमालय एकेडमीमा बोर्डस राखेका थिए । करीब २ वर्ष अघिदेखि निशान्तलाई मागी रोकाया र उनका छोराछोरीसँगै राखिएको थियो ।

मागी र उनका श्रीमानबीच वादविवादका कारण निशान्तले ज्यान गुमाउनु परेको प्रहरीले जनाएको छ ।

घटनाअघिसमेत फोन संवाद हुँदा श्रीमान-श्रीमतीबीच वादविवाद र झैझगडा भएको र रिसको झोंकमा मागीले कात्तिक २९ गते मृतक निशान्त स्कुलबाट फर्किएपछि थाहा नपाउने गरी दूधमा मुसा मार्ने औषधि मिसाई खुवाएको प्रहरीले जनाएको छ । 

मागीविरुद्ध प्रहरीले कर्तव्य ज्यान मुद्दा चलाएको छ ।