कुमारी बैंक लिमिटेडले 'फोनलोन ईएमआई' सुविधा सञ्चालनमा ल्याएको छ । 

छोटो अवधिको फोनलोन कर्जामा थप सुविधा दिन कुमारी बैंकले नेपालमै पहिलोपटक यस्तो सेवा ल्याएको बैंकले जनाएको छ ।

बैंकले एफ वान सफ्ट प्राइभेट लिमिटेडसँगको सहकार्यमा ईएमआईमा फोनलोन भुक्तानी गर्न सकिने व्यवस्था सञ्चालनमा ल्याएको हो । 

कुमारी बैंकमा विभिन्न तलब खाता भएका ग्राहकले १ लाख रूपैयाँदेखि अधिकतम २ लाख रूपैयाँसम्म कुमारी स्मार्ट मोबाइल बैंकिङबाट बिना धितो वा कागजी प्रकृयाविना नै फोनलोन सुविधा पाउन सक्नेछन् । 

सो कर्जा आयस्रोतको आधारमा ग्राहकले १,३,६,९ र १२ महिनामध्ये कुनै एक अवधि छनोट गरी भुक्तानी गर्न सकिनेछ ।

बैंकका डिजिटल बैंकिङ प्रमुख अनिष ताम्राकारका अनुसार आगामी फोनलोन गत वर्ष लञ्च गरिएको थियो । त्यतिबेला कुमारी बैंकका ग्राहकले एक महिनामै तिर्नुपर्ने बाध्यता थियो । यसमा ग्राहकले गुनासो गरेपछि ईएमआई ल्याइएको उनले जानकारी दिए ।

स्यालरी सेभिङ खाता प्रयोग गर्ने ग्राहकले १२ महिनासम्मलाई कर्जा लिन सक्नेछन् । यो प्रक्रिया निकै सहज रहेको उनले बताए ।

'अप्लाई गरेको केही सेकेन्डमै खातामा पैसा आउनेछ,' उनले भने । 

'बाई नाउ पे लेटर' ले ग्राहकहरूलाई सहज हुने उनले बताए ।

बिस्तारै सेवा विस्तार गर्दै नर्मल सेभिङखाता हुनेलाई पनि सेवा दिइने उनले बताए ।

एफवान सफ्टका प्रमुख कार्यकारी अधिकृत सुवास शर्माले कम्पनीले ग्राहकलाई सहज हुने गरी किस्तामा तिर्न सक्ने सेवा ल्याएको बताए ।

यसले नेपालको अर्थतन्त्रमा समेत ठूलो फड्को मार्ने आशा गरिएको उनको भनाइ छ ।

कार्यक्रममा बोल्दै बैंकका कार्यवाहक प्रमुख कार्यकारी अधिकृत रामचन्द्र खनालले बैंकका ग्राहकलाई सानातिना व्यक्तिगत खर्च पूर्ति गर्नका लागि यो सेवा निकै प्रभावकारी हुने बताए ।