नेपाली कांग्रेसको १४औं महाधिवेशनमा महामन्त्रीमा उम्मेदवारी दिने घोषणा गरेका कांग्रेस केन्द्रीय सदस्य गगनकुमार थापाले बिहीवार आफ्नो अवधारणापत्र सार्वजनिक गर्ने भएका छन् ।

दिउँसो ३ बजे प्रज्ञा प्रतिष्ठानमा एक समारोहबीच थापाले प्रतिबद्धता सार्वजनिक गर्न लागेका हुन् । 

‘समुन्नत नेपालः सम्मानित नेपाली’को संकल्प पूरा गर्न सक्ने पार्टी बनाउन नेपाली कांग्रेसको पुनर्जागरण र रूपान्तरणका लागि अवधारणा सार्वजनिक गर्न लागेको थापाले बताएका छन् ।

गगनले वडा अधिवेशनको बेलामै महामन्त्रीमा उठ्ने तयारी गरेको बताएका थिए । गगनलाई प्यानलमा समेट्नका लागि सभापतिमा उठ्ने आकांक्षा राखेका सबै नेताले पहल गरेका थिए । 

महामन्त्रीमा उठ्ने घोषणा गरेका अर्का युवा नेता विश्वप्रकाश शर्माले यसअघि नै कांग्रेसको अवधारणा सार्वजनिक गरेका थिए । शर्माको अवधारणापत्रमा कांग्रेसको कुनै सदस्यले एकपटक राष्ट्रपति, २ पटक प्रधानमन्त्री, ३ पटक मन्त्री र ४ पटक सांसद बन्न पाउने व्यवस्था गर्न प्रस्ताव गरिएको छ । 

कांग्रेसको १४औं महाधिवेशन भोलि मंसिर २४ देखि काठमाडौंमा शुरू हुँदैछ ।