३० जेठ २०८३, शनिबार
बेलायतका प्रधानमन्त्री बोरिस जोनसनले अहिलेसम्मको कार्यकालमा अनेकौं विवादको सामना गरेका छन् ।
तर पछिल्लो विवाद निकै गम्भीर छ ।
पोहोर सालको क्रिसमस आउनुअघि प्रधानमन्त्री कार्यालय १० डाउनिङ स्ट्रीटमा अधिकारीहरूले जमघट गरी रमाइलो गरेको दाबीका कारण जोनसन विवादमा परेका छन् । त्यस समयमा कोरोनाभाइरस रोक्नका लागि विभिन्न प्रतिबन्ध लगाइएकाले यस्ता गतिविधि गर्ने छुट कसैलाई पनि थिएन ।
आईटीभी न्युजमा मंगलवार उक्त पार्टीको भिडियो सार्वजनिक भएपछि विवाद झनै चर्केको हो । त्यसमा अधिकारीहरूले प्रेस ब्रीफिङमा के बोल्ने भन्ने विषयमा मजाक गरेका थिए ।
तर डाउनिङ स्ट्रीटले क्रिसमस पार्टी आयोजना नगरेको र कोरोनाभाइरस नियम पालन गरिएको दाबी गरेको छ । यस विषयमा छानबिन गर्नका लागि जोनसनले एक समितिको घोषणा बुधवार गरेका छन् ।
प्रधानमन्त्रीकी पूर्व प्रवक्ता अलेग्रा स्ट्राटनले सल्लाहकारको पदबाट राजीनामा दिएकी छन् ।
सन् २०२० को नोभेम्बर २७ र डिसेम्बर १८ मा जमघट गरिएको पाइएको छ । पहिलो जमघटमा जोनसनले भाषण समेत दिएको पाइयो । अनि दोस्रो जमघटमा गोप्य उपहारहरू आदानप्रदान गरिएको भेटियो ।
बेलायत सरकारले कोरोनाभाइरस नियन्त्रणका लागि थप कडा उपाय अपनाउन खोजेको बेलामा यो घटना सार्वजनिक भएको हो । प्लान बी नाम दिएर जोनसनले ओमिक्रोन केसहरू बढिरहेकाले गर्दा नियन्त्रण थप कसिने घोषणा बुधवार गरेका छन् ।
जनतालाई कठोर नियन्त्रण लगाउने अनि सरकारी अधिकारीहरू चाहिँ कार्यालयमा मोजमज्जा गर्ने भन्दै आक्रोश व्यक्त गरिएको छ ।
अधिकारीहरूले चाहिँ जानीजानी पार्टी गर्ने उद्देश्यले नै जमघट नगरेको बरू दिनको १८ घन्टा काम गर्दा थाकेपछि ताजा हुनका लागि रमाइलो गरेको बताएका छन् ।
जोनसन सरकारलाई अप्ठ्यारो पार्ने गरी कसले यो गोप्य भिडियो लीक गरायो भनेर समेत प्रश्न उठाउन थालिएको छ ।
