१४ असार २०८३, आइतबार
नेपाली कांग्रेसका सभापति शेरबहादुर देउवाले केन्द्रीय समितिको बैठकबाट विधान संशोधन प्रस्ताव पारित गरेर पदाधिकारी थप्न लागेपछि वरिष्ठ नेता रामचन्द्र पौडेलले विरोध गरेका छन् ।
देउवाले १४औं महाधिवेशन शुरू हुने अघिल्लो दिन केन्द्रीय कार्यसमितिको बैठक राखेर विधान संशोधन गर्न लागेका छन् ।
बैठकमा विधान संशोधन प्रस्ताव ल्याउन लागेको थाहा पाएपछि वरिष्ठ नेता पौडेलले कांग्रेस केन्द्रीय कार्यालयका सचिव कृष्ण पौडेललाई फोन गरेर बैठकमा सहभागी नहुने जानकारी गराएका छन् ।
‘रामचन्द्र पौडेलले कार्यालय सचिव कृष्ण पौडेललाई फोन गरेर महाधिवेशनको अघिल्लो दिन विधान संशोधन हुन नसक्ने, त्यस्तो एजेण्डा भएको बैठकमा सहभागी नहुने जानकारी गराउनुभएको छ । पौडलले बैठकमा सहभागी नहुनुहुने भएको छ,’ पौडेल निकट एक नेताले लोकान्तरलाई भने ।
देउवाले विधान संशोधन गरेर उपसभापति र २ वटा सहमहामन्त्री पद थप्न लागेका छन् ।
१४औं महाधिवेशनमा संस्थापन पक्षबाट उम्मेदवारको आकांक्षी व्यवस्थापन गर्न कठिन भएपछि देउवाले विधान संशोधन गरेरै भए पनि आफू पक्षका नेताहरूको व्यवस्थापन गर्न लागेका हुन् ।
उनले हालसम्म महाधिवेशनमा पदाधिकारीको उम्मेदवार तय गर्न सकेका छैनन् ।
