कांग्रेस सभापतिका प्रत्यासी डा. शेखर कोइरालाले आफू दोस्रो चरणको प्रतिस्पर्धामा जाने बताएका छन् ।

सभापतिका अन्य प्रत्यासीले दोस्रो चरणको निर्वाचनमा देउवालाई समर्थन गर्ने घोषणा गरेपछि देउवा पक्षका नेताहरूले सहमतिका लागि निर्वाचनमा नजान आग्रह गरेका थिए ।

तर, शेखरले परिणाम जस्तो आए पनि स्वीकार्ने भन्दै आफू निर्वाचनमा जाने बताएका हुन् ।

राजधानीमा मंगलवार पत्रकार सम्मेलन नै गरेर शेखरले आफूले दोस्रो चरणमा जीत हात पार्ने विश्वास समेत व्यक्त गरेका छन् ।

उनले गुट-उपगुट बिर्सिएर आफ्नो मनले भनेको ठाउँमा भोट हाल्न मतदातालाई आग्रह गरेका छन् ।

सभापतिका कुनै पनि उम्मेदवारले ५० प्रतिशतभन्दा बढी मत ल्याउन नसकेपछि अहिले दिउँसो साढे ३ बजेबाट दोस्रो चरणको मतदान हुँदैछ ।

पहिलो चरणमा देउवाले २२ सय ५८ र शेखर १७ सय २ मत प्राप्त गरेका थिए ।

सभापतिका अन्य प्रत्यासी प्रकाशमान सिंह, विमलेन्द्र निधि र कल्याण गुरुङ तीनै जनाले दोस्रो चरणमा देउवालाई सघाउने घोषणा गरिसकेका छन् ।