०२ असार २०८३, मंगलबार
अमेरिकाको डेमोक्रेटिक पार्टीका सांसद जो मान्चिनले राष्ट्रपति जो बाइडनको बिल्ड ब्याक बेटर परियोजनालाई विफल तुल्याउने गरी त्यसको विपक्षमा मत जाहेर गरेका छन् ।
सामाजिक खर्च सम्बन्धी यस कानूनका विषयमा महिनौंदेखि सम्झौता भइरहेको थियो तर अन्तिममा त्यो काम लागेन । विधेयक पारित गर्न मान्चिनको भोट अनिवार्य हुन्छ ।
मान्चिनले सार्वजनिक रूपमा यस विधेयकको विरोध गर्ने भनेपछि ह्वाइट हाउस रिसाएको छ । ‘सिनेटर मान्चिनले आगामी दिनहरूमा पनि यस विषयमा संवाद गर्ने भनेका थिए अनि साझा दृष्टिकोणमा पुग्नका लागि मिलेर काम गर्ने बताएका थिए,’ ह्वाइट हाउसकी प्रेस सचिव जेन पिसाकीले बताइन् ।
‘उनले फक्स च्यानलमा गरेको टिप्पणी र लिखित बयानले त्यस्तो संवादलाई अन्त्य गर्न खोजेको हो भने त्यो उनको अडान अचानक फेरिएको संकेत हो,’ उनले थपिन् । ‘राष्ट्रपति र सिनेटरका सहकर्मीहरूसँग उनले हाउस र सिनेटमा गरेको प्रतिबद्धतालाई पनि त्यसले भत्काएको छ ।’
वेस्ट भर्जिनियाका सिनेटर मान्चिनले फक्स न्युजसँग आइतवार कुराकानी गर्दै भने, ‘म यस विधेयकलाई समर्थन गर्न सक्दिनँ । अहँ, पटक्कै सक्दिनँ । मैले मानवीय रूपमा सम्भव हुन सक्ने सबै प्रयास गरें । तर म सहमतिमा पुग्न सकिनँ ।’
बिल्ड ब्याक बेटर परियोजनाले अहिलेको महंगीलाई झन् बढाउने भनी मान्चिनले विरोध गरेका हुन् ।
