पाल्पा बस दुर्घटनामा मृत्यु हुनेको संख्या आठ पुगेको छ । 

दुर्घटनामा परी ७ जनाको घटनास्थलमै र एक जनाको उपचारका क्रममा मृत्यु भएको जिल्ला प्रहरी कार्यालय पाल्पाले जनाएको छ । 

दुर्घटनामा परी मृत्यु हुनेको सनाखत हुन बाँकी छ । ३६ जना मलामी सवार बस बाटो चिप्लो हुँदा सडकबाट करीब ५० मिटर तल झरेको प्रहरीको भनाइ छ । 

रुपन्देहीको बुटवल उपमहानगरपालिका-१७, रानीगञ्जका वीरबहादुर विश्वकर्माको शव दाहसंस्कारका लागि धार्मिक तीर्थस्थल रिडी लैजाँदा मलामी चढेको बस दुर्घटना परेको पुष्टि भएको छ ।

रानीगञ्जका ७० वर्षीय विश्वकर्माको शव लिएर गुल्मीको रिडी जाँदै गरेको लु २ ख ७२७९ नम्बरको बस पाल्पाको रिब्दीकोट  लगुवामा दुर्घटनामा परेको थियो ।

बुटवल रानीगञ्ज निवासी ७० वर्षीय विश्वकर्माको शनिवार निधन भएको वडाध्यक्ष  सन्तबहादुर रानाले बताए ।