२१७ जना उपसचिवमा बढुवा गर्नका लागि एक हजार ३०२ जना शाखा अधिकृतले दरखास्त दिएका छन् ।

लोक सेवा आयोगले विभिन्न सेवा समूह, उपसमूहअन्तर्गत ४६ वटा समूहमा बढुवा खुलाएको थियो ।

ज्येष्ठताको आधारमा २४ र कार्यक्षमताको आधारमा २२ गरी कुल ४६ वटा समूहका लागि आयोगले विज्ञापन गरेको हो । जसमध्ये ज्येष्ठताको आधारमा ११० र कार्यक्षमताको आधारमा १०७ गरी कुल २१७ वटा पदमा उपसचिवको लागि बढुवा खुलाइएको हो ।

त्यसमध्ये एक हजार ३०२ जनाले आफ्नो दरखास्त बुझाएका हुन् । उक्त दरखास्तसहितको फाइल अहिले संघीय मामिला तथा सामान्य प्रशासन मन्त्रालयले अध्ययन गर्न शुरू गरेको छ ।

स्रोतका अनुसार करीब एक हप्तापछि उक्त पदको नतिजा प्रकाशन गर्ने तयारी गरिएको छ ।

दुईसहसचिव बढुवाको नतिजा निकाल्ने तयारी

यसअघि ३८ सहसचिव बढुवाका लागि खुलाइएको विज्ञापन मध्ये ३६ सहसचिवको बढुवा गरिएको छ । वन समूहको जेनेरल फरेस्ट्री समूहअन्तर्गतको दुई जना सहसचिव बढुवाको नतिजा आउन बाँकी रहेको मन्त्रालय स्रोतले जनाएको छ ।

'एक जना ज्येष्ठताको आधारमा र एक जना कार्यक्षमताको आधारमा गरी दुई जना सह-सचिवको नतिजा आउन मात्र बाँकी छ,' स्रोतले लोकान्तरसँग भन्यो, 'त्यसमध्ये ज्येष्ठताअन्तर्गत ९ जना र कार्यक्षमताअन्तर्गत १० जनाले दरखास्त दिएका छन् ।'

१९ जना उम्मेदवारमध्ये दुई जना सहसचिवमा बढुवा सिफारिस हुनेछन् ।