नेकपा (एकीकृत समाजवादी)का अध्यक्ष माधवकुमार नेपालले एमाले अध्यक्ष केपी शर्मा ओलीले राष्ट्रिय सभा निर्वाचनमा हार स्वीकार गरिसकेको बताएका छन् । 

पार्टीको काठमाडौं महानगर कमिटीले शुक्रवार आयोजना गरेको एक कार्यक्रममा बोल्दै अध्यक्ष नेपालले राष्ट्रिय सभाको निर्वाचनमा ओलीले हार स्वीकार गरेको बताएका हुन् । 

एमाले अध्यक्ष ओलीले शुक्रवार पार्टीका जिल्लाहरूको अधिवेशन उद्घाटनका क्रममा ‘राष्ट्रिय सभा निर्वाचनको परिणाम आफ्नो पार्टीका लागि प्रतिकूल आउन सक्ने’ बताएका थिए । 

सोही भनाइप्रति इंगित गर्दै अध्यक्ष नेपालले ओलीले आफ्नो दम्भी स्वभावविपरीत राष्ट्रिय सभाको निर्वाचनमा आफ्नो पार्टीको पराजय निश्चित छ भनेर भाषणमै स्वीकार गरेको टिप्पणी गरे । उनले ओलीले देशभर एकसाथ जिल्लाहरूको अधिवेशन उद्घाटन गरेर नयाँ नेतृत्व स्थापित हुन नदिएको आरोपसमेत लगाए । 

‘आज तपाईंहरूले सुन्नु भएको होला– केपी ओलीको एउटा भाषण । त्यो भाषणमा अब राष्ट्रिय सभाको चुनावमा हाम्रो पराजय निश्चित छ भनेर स्वीकार गरिएको छ । सुन्नु भयो, हैन ? हार स्वीकार गरेका छन्,’ उनले भने, ‘कसरी स्वीकार गरे होला ? त्यो दम्भी स्वभावले त दिँदैन । त्यो स्वभाव कस्तो छ भन्दाखेरी नयाँ नेतृत्व विकास गर्नै नदिने ।’

उनले एमालेमा सिद्धान्तनिष्ट कार्यकर्ताहरू नभएको पनि उनले बताए । ‘नेतालाई देउता बनाउनेलाई देवत्वकरण भनिन्छ । देवत्वकरण भइसकेपछि त्यो देउताको वरिपरि पूजकहरूमात्रै बस्ने । भजनभण्डली । देउताको त भजन गर्नु पर्‍यो नि,’ उनले भने, ‘त्यहाँ सिद्धान्तनिष्ट कार्यकर्ताहरु छैनन् । आलोचनात्मक चेत भएका मानिसहरु छैनन् । विश्लेषण गर्न सक्ने खुवी भएका मानिसहरू ती हैनन् ।’