संसारका नम्बर १ टेनिस खेलाडी नोभाक जोकोविचले अस्ट्रेलिया सरकारविरुद्ध भिसा रद्द गरिएको केस जितेका छन् । 

अस्ट्रेलिया सरकारले जोकोभिचको भिसा रद्द गर्ने फैसला लिनु गलत भएको अदालतले निर्णय दियो । त्यससँगै अदालतले जोकोविचको पासपोर्ट र अन्य सामग्री तत्काल फर्काउन पनि सरकारलाई आदेश दिएको छ । 

भिसा रद्द गरिएपछि जोकोविच चार दिनसम्म अध्यागमन विभागको होटलमा बसेका थिए । 

जोकोविचले कोरोनाको खोप नलगाइन अस्ट्रेलिया प्रवेश गरेको आरोप छ । अस्ट्रेलियामा त्यसका विषयमा कठोर कानून छ । 

मुद्दा जितेपछि जोकोभिचले अस्ट्रेलियन ओपन केस खेल्ने निश्चित बनेको छ । 

तर केस जिते पनि जोकोविचलाई अस्ट्रेलिया बाहिर पठाउने अधिकार सरकारसँग रहेको र यस विषयमा तत्काल फैसला लिने एक मन्त्रीको भनाइ छ । 

जोकोविचले मेडिकल कारणले गर्दा खोप लगाउन नसकेको भनेपछि उनलाई टेनिस खेल्न छुट दिइएको थियो । तर अस्ट्रेलिया पुगेपछि उनलाई मेडिकल समस्याको प्रमाण पेश गर्न लगाइएको थियो । 

उनले डिसेम्बर १६ मा कोरोना लागेको र तत्काल खोप लगाउन नसकिने बताएका थिए । त्यसपछि उनलाई विमानस्थलमै रोकियो अनि उनको भिसा रद्द गरियो ।

भिसा रद्द गरिएपछि जोकोविचले अदालतमा त्यसलाई चुनौती दिएका थिए । सुनुवाइपछि अदालतले जोकोविचलाई सही ठहर गरेको छ । 

तर अस्ट्रेलिया सरकार उनलाई देशबाहिर निकाल्न तम्तयार देखिएको छ ।