१० साउन २०८३, आइतबार
नबिल बैंकले नेपाल बंगलादेश बैंक (एनबीबी) लाई प्राप्ति गर्ने भएको छ ।
एनबी बैंक सञ्चालक समितिको बिहीवार बसेको बैठकले नबिलसँग मर्जरमा जाने निर्णय गरेपछि दुवै बैंकले मर्जर सम्झौतामा हस्ताक्षर गर्न लागेका हुन् ।
बिहीबारै बसेको नबिल बैंकको सञ्चालक समितिले पनि नेपाल बंगलादेश बैंकलाई प्राप्ति गर्ने निर्णय गरेको नबिल बैंकका एक उच्च अधिकारीले जानकारी दिए ।
उनका अनुसार नबिलले एनबी बैंकको शेयर प्रतिकित्ता ४३ रुपैयाँमा खरिद गर्ने भएको छ । नबिलले खरिद गर्ने शेयरमा एनबी बैंकले सहमति दिएपछि बिहीवार नै २ बैंकबीच मर्जर गर्ने सम्झौता हुन लागेको हो ।
नबिल बैंकको शुक्रबार वार्षिक साधारणसभा भएकाले बिहिबारै मर्जरको सम्झौता गर्न लागेको हो । नबिल बैंकले १००ः४३ को स्वाप रेसियोमा एनबीलाई एक्वायर गर्ने गरी सम्झौता हुने तय भइसकेको छ । सम्झौतालाई नबिलले वार्षिक साधारणसभाबाट स्वीकृत गराउने तयारी गरेको छ ।
पछिल्लो समय नबिल बैंकले नेपाल बंगलादेश बैंकलाई एक्वाएर गर्ने विषयमा छलफल चलिरहेको थियो । २ बैंक मर्जर भएपछि बन्ने बैंकको नाम पनि नबिल बैंक नै राख्ने सहमति भएको बैंकका एक अधिकारीले बताए ।
दुवै बैैंकले सम्पत्ति र दायित्वको मूल्यांकन (डीडीए) गर्दा १० प्रतिशतसम्म तलमाथि भएमा पनि स्वाप रेसियो भने १००ः४३ नै कायम गर्ने सहमति भएको छ ।
के हुन्छ आईएफआईसीको शेयर विवाद ?
नेपाल बंगलादेश बैंक र नबिल बैंकबीच मर्जर गर्ने सहमति भए पनि एनबी बैंकमा रहेको आईएफआईसी बैंकको शेयरबारे भने अदालतबाट जस्तो फैसला आउँछ सोही अनुसार कार्यान्वयन गर्ने सम्झौता भएको नबिल बैंकका एक अधिकारीले बताए ।
नेपाल बंगलादेश बैंकमा आईएफआईसी बैंकको ४१ प्रतिशत (३ करोड ६८ लाख २७ हजार ३२६ कित्ता शेयर) शेयर किनबेचबारे २ ठूला व्यावसायिक घराना चौधरी र दुगड ग्रूपबीच विवाद छ ।
अदालत पुगेको विवादमा काठमाडौं जिल्ला अदातलले आईसीएफसीको शेयर विनोद चौधरीलाई तत्काल नबेच्न आदेश दिएको छ ।
काठमाडौं जिल्ला अदालतले नेपाल बंगलादेश बैंकमा रहेको ढाकाको वाणिज्य बैंक आईएफआईसीको स्वामित्वमा रहेको शेयर चौधरी ग्रूपलाई नबेच्न आदेश दिएको हो ।
एमभी दुगड ग्रूपका अध्यक्ष मोतिलाल दुगडले शेयर किन्न अप्रिल २०२१ मै स्वीकृति पाइसकेको र करार सम्झौता समेत भइसकेको दाबी गरेका छन् तर चौधरी ग्रूप भने सम्झौताविरूद्ध अदालत गएको थियो ।
अधिवक्ता गान्धी पण्डित पनि अदालतमा विषय भए पनि नबिल बैंक र नेपाल बंगलादेश बैंकले मर्जरको सम्झौता गर्दा कुनै असर नपर्ने बताउँछन् ।
उनले भने, ‘अदालतले जसलाई शेयर बेच्नु भन्छ उसैलाई दिने भएकोले एनबी बैैंक मर्जरमा जान भने शेयर विवादले कुनै असर पर्दैन ।’
अदालतले आईएफआईसीको शेयरको विषयमा मात्रै प्रश्न उठाएको छ । मर्जरको विषयमा भने केही बोलेको छैन । त्यसैले मर्जर अगाडि बढाउन कुनै असर नपर्ने पनि उनले बताए । पण्डितका अनुसार आईएफआईसीको शेयर जसले खरिद गरे पनि मर्जरपछि पनि कारोबार गर्न मिल्छ ।
