०५ साउन २०८३, मंगलबार
युक्रेनका लेफ्टिनेन्ट जनरल अलेक्जेन्डर पाव्ल्युकले आफ्नो देशमा रुसी आक्रमण फेब्रुअरी २० मा हुन सक्ने दाबी बेलायती पत्रिका द टाइम्समा गरेका छन् ।
त्यो दिन बेइजिङमा आयोजित शीतकालीन ओलम्पिक सकिन्छ । पाव्ल्युकले उक्त मितिबाट आफूहरू चिन्तित रहेको बताए । चीनले आयोजना गरेको विश्वव्यापी खेलकुद प्रतियोगितालाई रुसले भाँजो हाल्ने गरी युक्रेनमा आक्रमण नगर्ने पाव्ल्युकको भनाइ छ ।
युक्रेनीहरू रुसीलाई हातैले किचिपिची पार्न तयार रहेको भनी पाव्ल्युकले चेतावनी समेत दिएका छन् । आफूले सैन्य सहयोग नपाएको र रुसविरुद्ध प्रतिबन्ध पनि नलगाइएको भनी युक्रेनले गुनासो गरिरहेको बेलामा पाव्ल्युकको भनाइ आएको हो ।
पाव्ल्युक बाहेक अन्यले पनि बेइजिङ ओलम्पिक र युक्रेन आक्रमणलाई जोडेका छन् । ब्लूमबर्ग पत्रिकामा शनिवार प्रकाशित एक रिपोर्टमा चीनका राष्ट्रपति सी चिनपिङले पुटिनलाई व्यक्तिगत रूपमा नै युक्रेनमाथिको आक्रमण तत्कालै नगर्न अनुरोध गरेको उल्लेख छ । सीले ओलम्पिक चलिरहेको गौरवशाली क्षणमा युक्रेनमाथि आक्रमण नगर्न आग्रह गरेको दाबी गरिएको छ ।
उक्त रिपोर्टमा यसको प्रमाण भने दिइएको छैन । बेइजिङका एक कूटनीतिकर्मीको हवाला दिइएको छ ।
रुसमा रहेको चिनियाँ दूतावासले ब्लूमबर्गको रिपोर्ट झूटो र उत्तेजक भएको दाबी गरेको छ ।
