०८ साउन २०८३, शुक्रबार
प्यूठानमा शुक्रवार राति जन्ती बोकेको जीप दुर्घटना हुँदा मृत्यु भएकामध्ये एकै परिवारका तीन जना परेका छन् ।
नेपाली कांग्रेस गौमुखी गाउँपालिका उपसभापति बसन्त खड्का, उनकी श्रीमती बसन्ती र छोरी एलिसाको पनि मृत्यु भएको छ । खड्काका एक छोरा भने जन्तमा सहभागी थिएनन् ।
कांग्रेस प्यूठानका सभापति विष्णु गिरीले दुर्घटनापछि गाउँ शोकमा डुबेको बताए । दुर्घटनामा ८ जनाको मृत्यु भएको छ भने ५ जना गम्भीर घाइते भएका छन् ।
‘हाम्रो पार्टीको गाउँपालिका उपसभापतिसहित उहाँको परिवार दुर्घटनामा पर्यो,’ गौमुखी गाउँपालिका अध्यक्षसमेत रहेका गिरीले लोकान्तरसँग भने, ‘यस्तो बज्रपात आइलाग्यो हामीलाई आइलाग्यो ।’
गौमुखी–६ ओखरपाटाबाट बेहुली लिएर फर्कंदै गरेको ग १ ज ५०९२ नम्बरको जीप ओखरपाटामा दुर्घटना भएको हो ।
दुर्घटनामा दुलही रिमा जिसी, दुलाहा दानबहादुर खड्कासहित अन्य घाइतेको थप उपचारको लागि बुटवल ल्याइएको छ ।
प्यूठानमा केही वर्ष अगाडि जन्ती बोकेको बस दुर्घटना हुँदा ४१ जनाको मृत्यु भएको थियो । अहिले फेरि जन्ती बोकेको गाडी दुर्घटनाले त्यो घटनालाई सम्झाएको छ ।
