३० असार २०८३, मंगलबार
रुसले नेटोसँगको तनाव बढिरहेको बेलामा आफ्नो सहयोगी मुलुक बेलारुसमा आणविक बमवर्षक विमान शनिवार पठाएको छ ।
रुसका रक्षा मन्त्रालयका अनुसार, दुईवटा टीयू–२२एम३ विमानहरूले बेलारुसका वायुसेना र वायु रक्षासँग मिलेर चार घन्टा अभ्यास गरेको छ ।
युक्रेन र रुसबीचको तनाव दिनदिनै बढिरहेको छ । युक्रेनमाथि रुसले जुनबेला पनि आक्रमण गर्न सक्ने भनी पश्चिमले हल्ला गरिरहेको छ ।
अभ्यासका क्रममा बेलारुसमा गश्ती गर्दै विमानहरू कैयौंपटक उडे । बेलारुसको सीमा युक्रेनको उत्तरमा पर्छ ।
रुसले साइबेरिया र सुदूरपूर्वी क्षेत्रबाट आफ्ना सैनिकहरू बेलारुस पठाएको छ । त्यस तैनाथीसँगै युक्रेननजिक रुसको सैन्य तैनाथी बढेको छ । त्यसले गर्दा नै पश्चिमी मुलुकहरूले युक्रेनमाथि रुसको आक्रमण हुन लागेको बताएका हुन् ।
बेलारुसमा रुसी सैनिकको तैनाथीमा पश्चिमी मुलुकहरूले चिन्ता व्यक्त गरेका छन् ।
बेलारस सीमाबाट युक्रेनको राजधानी किएभ जम्मा ७५ किलोमिटर टाढा छ ।
