अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी)लाई प्रतिनिधि सभाको कार्यसूचीमा राख्न सरकारले गरेको प्रस्तावमा सहमति जुट्न नसकेपछि शुक्रवार पनि टेबुल नहुने भएको छ । 

संसद भवन नयाँ बानेश्वरमा शुक्रवार बसेको बैठकमा कानून मन्त्री दीलेन्द्र बडूले एमसीसी कार्यसूचीमा राख्न प्रस्ताव गरेका थिए । 

नेपाली कांग्रेस र लोसपाले एमसीसी अगाडि बढाउन सहमति जनाए पनि अन्य दलले पहिला सदनको अवरोध खुल्नु पर्ने अडान राखेका थिए । नेकपा एमाले अनुपस्थित रहेको बैठकमा माओवादी केन्द्रले पहिला संसदको अवरोध खुल्नुपर्ने प्रस्ताव राखेको छ । 

सहमति जुट्न नसकेपछि शुक्रवारको बैठकमा एमसीसी टेबुल नहुने भएको छ । 

अर्को बैठक फागुन ११ या १२ गतेको लागि सार्ने तयारी भएको संसद सचिवालय स्रोतले जानकारी दियो । एमसीसी अनुमोदनका लागि अमेरिकाले दिएको समयसीमा फागुन १६ गते सकिँदैछ । 

एमसीसीमा सहमति जुट्न नसकेपछि सत्ता गठबन्धनको बैठक ८ गते आइतवारसम्मको लागि सारिएको छ ।