नेकपा एमालेका अध्यक्ष केपी शर्मा ओलीले माओवादी केन्द्रका अध्यक्ष पुष्पकमल दाहाल प्रचण्ड मूर्तिझैँ बसेर अरूलाई एमसीसीको विरोधमा उतारेको टिप्पणी गरेका छन् । 

चन्द्रागिरि नगरपालिकास्थित कालु पाँडेको समाधिस्थलमा आयोजित कवि गोष्ठी कार्यक्रमलाई सम्बोधन गर्दै ओलीले भने, ‘सरकारमा बस्ने तमासा गर्ने, एमसीसी पास गर्ने षड्यन्त्र गर्ने, टेबुल गर्ने षड्यन्त्र गर्ने आएर आफू चुप लागेर मूर्तिझैँ बस्ने, पछाडिकोलाई नारा लगाउ नारा लगाउ भन्ने । यताकालाई उठ भन्ने उताकालाई बस भन्ने ।’

ओलीले अगाडि भने, ‘सरकार, सडक र सदनमा आफैँ हुने, एमसीसी आफैँ सही गर्ने, आफैँ टेबल गर्ने, सही गर्ने टेबल गर्नेहरूलाई सडकमा उत्रिएकाहरूले कतै केही भनेको सुन्नुभएको छ ? केही भन्दैनन् ।’ 

सरकारमा रहेका दलहरूले एकतातिर एमसीसी संसदमा टेबल गर्ने सहमति गरेको र कार्यकर्तालाई प्रदर्शनमा उतारेर दोहोरो चरित्र देखाएको भन्दै ओलीले प्रचण्ड–माधव नेपालको आलोचना गरेका छन् । तर, ओलीले प्रचण्डको नाम उल्लेख नगरी संसदमा चुपचाप बसेर वरिपरिकालाई विरोधमा उतारेको बताएका हुन् ।

एमसीसीको विरोध प्रदर्शनमा बाटो भत्काएको भन्दै ओलीले भने, ‘सत्तामा बस्ने क्रान्तिकारीहरू निर्माणका बजेट काट्ने अनि बाटो भत्काउने । कोही छैन नभत्काउ भन्नेहरू । कस्तो सरकार हो यो ?’ 

सरकारले आदेश नदिएका कारण प्रहरी भने कुटाइ खाएर भागिरहेको देखिएको उनले बताए ।